ក្រុមចោរព័ត៌មានវិទ្យា ដែលមានទំនាក់ទំនងជាមួយរដ្ឋាភិបាលរបស់រុស្ស៊ី បានព្យាយាមលួចទិន្នន័យពីកម្មវិធី WhatsApp របស់បុគ្គលិក នៅអង្គការក្រៅរដ្ឋាភិបាលដែលផ្តល់ជំនួយដល់អ៊ុយក្រែន។ នេះបើយោងតាមក្រុមហ៊ុន Microsoft Corp។

តាមរយៈការបង្ហោះក្នុងប្លុក កាលពីថ្ងៃប្រហស្បតិ៍ (ទី១៦ ខែមករា) អ្នកស្រាវជ្រាវរបស់ក្រុមហ៊ុន Microsoft បានឲ្យដឹងថា អ្នកវាយប្រហារទាំងនោះ ដែលជាប់ពាក់ព័ន្ធជាមួយសេវាសន្តិសុខសហព័ន្ធរបស់រុស្ស៊ី ឬ FSB បានផ្ញើអ៊ីម៉ែលទៅកាន់គោលដៅជាក់លាក់ជាច្រើន ដោយសុំឲ្យពួកគេចូលរួមជាមួយក្រុម WhatsApp។

សារក្លែងបន្លំ ជាញឹកញាប់ហាក់ដូចជាបានផ្ញើមកពីមន្ត្រីរដ្ឋាភិបាលសហរដ្ឋអាមេរិក និងមានលេខកូដ QR ដែលនឹងផ្តល់ព័ត៌មានលម្អិត អំពីគំនិតផ្តួចផ្តើមដែលមានបំណងគាំទ្រអ៊ុយក្រែន ក្នុងសង្គ្រាមដែលកំពុងបន្តមានប្រឆាំងនឹងប្រទេសរុស្ស៊ី។

តែយ៉ាងណាក្ដី ក្រុមហ៊ុន Microsoft មិនបានប្រាប់ឲ្យដឹងថា តើការប៉ុនប៉ងណាមួយ នាំឲ្យការរំលោភបំពានបានជោគជ័យដែរ ឬទេ។ យោងតាមក្រុមហ៊ុន Microsoft បានឲ្យដឹងថា ការវាយប្រហារតាមអ៊ីនធឺណិត មានទំនាក់ទំនងទៅនឹងក្រុម Star Blizzard ជាក្រុមចោរព័ត៌មានវិទ្យាដែលត្រូវបានគេសង្ស័យថា មានការគាំទ្រដោយរដ្ឋ។

ក្រុមហ៊ុន Microsoft ដែលមានមូលដ្ឋាននៅទីក្រុង Redmond រដ្ឋាវ៉ាស៊ីនតោន បានលើកឡើងថា ក្រសួងយុត្តិធម៌សហរដ្ឋអាមេរិក បានរឹបអូស ឬដកហូតគេហទំព័រចំនួន ១៨០ ដែលពាក់ព័ន្ធជាមួយក្រុមនេះ ចាប់តាំងពីខែតុលា ដោយមានជំនួយខ្លួន។

អ្នកនាំពាក្យ WhatsApp បាននិយាយនៅក្នុងសេចក្តីថ្លែងការណ៍មួយថា ក្រុមហ៊ុនការពារការសន្ទនាផ្ទាល់ខ្លួន ជាមួយវិធីការពារសុវត្តិភាព ហើយបានលើកទឹកចិត្តអ្នកប្រើប្រាស់ឲ្យចុចលើតំណភ្ជាប់ពីមនុស្សដែលពួកគេស្គាល់ និងទុកចិត្តតែប៉ុណ្ណោះ៕