តុលាការប៉ាគីស្ថាន នៅថ្ងៃសុក្រ (ទី១៧ ខែមករា) នេះ បានកាត់ទោសអតីតនាយករដ្ឋមន្ត្រី លោក Imran Khan ឲ្យជាប់ពន្ធនាគាររយៈពេល ១៤ឆ្នាំ ក្នុងសំណុំរឿងពុករលួយ ពាក់ព័ន្ធនឹងដីធ្លី ដោយនេះក្លាយជាឧបសគ្គដល់ពន្លកនៃការចរចា រវាងគណបក្សរបស់លោក និងរដ្ឋាភិបាល ដែលធ្វើឡើងក្នុងគោលបំណងធ្វើឲ្យថមថយនូវអស្ថិរភាពនយោបាយ នៅក្នុងប្រទេសអាស៊ីខាងត្បូងមួយនេះ។

សាលក្រម ក្នុងសំណុំរឿងនេះ ត្រូវបានបញ្ជូនដោយតុលាការប្រឆាំងអំពើពុករលួយ នៅឯពន្ធនាគារ ក្នុងទីក្រុងយោធភូមិភាគ Rawalpindi ជាកន្លែងដែលលោក Khan ត្រូវបានកាត់ទោសឲ្យជាប់ពន្ធនាគារនៅទីនេះ តាំងពីខែសីហា ឆ្នាំ២០២៣ មកម្ល៉េះ។

ចំណែកភរិយារបស់លោក គឺលោកស្រី Khan Bushra Bibi ក៏ត្រូវបានរកឃើញថា មានទោសផងដែរ ហើយត្រូវបានផ្ដន្ទាទោសឲ្យជាប់ពន្ធនាគាររយៈពេល ៧ឆ្នាំ។ សារព័ត៌មាន Geo News បានរាយការណ៍ថា លោកស្រីបាននៅក្រៅឃុំ ប៉ុន្តែត្រូវបានចាប់ខ្លួន បន្ទាប់ពីសាលក្រមត្រូវបានប្រកាស។

រដ្ឋមន្ត្រីច្បាប់ លោក Azam Nazeer Tarar បានប្រាប់អ្នកសារព័ត៌មានថា គណបក្សរបស់លោក Khan អាចប្តឹងឧទ្ធរណ៍ទៅតុលាការជាន់ខ្ពស់ជាងនេះ ដើម្បីប្រឆាំងនឹងការសម្រេចនេះ ហើយថា អតីតកីឡាករគ្រិកឃីតរូបនេះ ក៏អាចដាក់ញត្តិសុំលើកលែងទោស ឬសម្រាលទោសទៅកាន់ប្រធានាធិបតីប៉ាគីស្ថានផងដែរ។ លោក Omar Ayub ជំនួយការរបស់លោក Khan បាននិយាយថា គណបក្សនឹងតទល់ជាមួយសាលក្រមនេះ នៅតុលាការជាន់ខ្ពស់ជាងនេះ។

គួរបញ្ជាក់ថា អតីតនាយករដ្ឋមន្រ្ដីវ័យ ៧២ឆ្នាំរូបនេះ ត្រូវបានចោទប្រកាន់ជាផ្លូវការពីបទចោទ ដែលថា រូបលោក និងភរិយា បានទទួលអំណោយពីក្រុមហ៊ុនអភិវឌ្ឍន៍អចលនទ្រព្យ ក្នុងអំឡុងពេលកាន់តំណែងជានាយករដ្ឋមន្ត្រីពីឆ្នាំ២០១៨ ដល់ឆ្នាំ២០២២ ជាថ្នូរនឹងការគាំទ្រដោយមិនស្របច្បាប់។ ទាំងលោក Khan និងលោកស្រី Bibi បានផ្ដល់ចម្លើយពីភាពគ្មានទោស៕