ប្រទេសរុស្ស៊ី នៅថ្ងៃសុក្រ (ទី១៧ ខែមករា) នេះ បានលើកឡើងថា រាល់ការដាក់ប្រភពធនធានយោធារបស់អង់គ្លេស នៅក្នុងអ៊ុយក្រែន ក្រោមកិច្ចព្រមព្រៀងភាពជាដៃគូរយៈពេល ១០០ឆ្នាំថ្មី រវាងទីក្រុងគីវ និងទីក្រុងឡុងដ្រ៍ នឹងបង្កជាការព្រួយបារម្ភ សម្រាប់ទីក្រុងម៉ូស្គូ។

នេះជាសម្ដីរបស់អ្នកនាំពាក្យវិមានក្រឹមឡាំង លោក Dmitry Peskov នៅពេលត្រូវបានសួរ អំពីលទ្ធភាពរបស់ចក្រភពអង់គ្លេស ក្នុងការបង្កើតមូលដ្ឋានយោធា នៅអ៊ុយក្រែន ក្រោមកិច្ចព្រមព្រៀងដែលបានប្រកាស កាលពីថ្ងៃព្រហស្បតិ៍ (ទី១៦ ខែមករា) ដោយប្រធានាធិបតីអ៊ុយក្រែន លោក Volodymyr Zelenskiy និងនាយករដ្ឋមន្ត្រីអង់គ្លេស លោក Keir Starmer។

លោក Peskov បាននិយាយថា៖ «ដោយសារចក្រភពអង់គ្លេស គឺជាប្រទេសសមាជិករបស់អង្គការណាតូ វឌ្ឍនភាពនៃហេដ្ឋារចនាសម្ព័ន្ធយោធារបស់ប្រទេសនេះឆ្ពោះទៅកាន់ព្រំដែនរបស់យើង គឺពិតជាកត្តាគួរឲ្យព្រួយបារម្ភណាស់។ ក្នុងករណីណាក៏ដោយ វានឹងចាំបាច់ឲ្យមានការវិភាគបន្ថែមទៀតនូវអ្វីដែលនឹងកើតឡើង»។

គួរបញ្ជាក់ថា អំឡុងកិច្ចពិភាក្សា នៅក្នុងទីក្រុងគីវ នាថ្ងៃព្រហស្បតិ៍នោះ លោក Zelenskiy បាននិយាយថា លោកបាននិយាយជាមួយលោក Starmer អំពីបំណងរបស់ទីក្រុងគីវ ដែលចង់ឲ្យមានការពង្រាយកងទ័ពរក្សាសន្តិភាពរបស់លោកខាងលិច នៅក្នុងប្រទេសអ៊ុយក្រែន ប្រសិនបើសង្រ្គាមជាមួយរុស្ស៊ីបានបញ្ចប់។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Sky News នៅពេលត្រូវបានសួរថា តើចក្រភពអង់គ្លេស នឹងផ្ដល់ការរួមចំណែកជាកងទ័ពដែរ ឬទេ លោក Starmer បានប្រាប់ថា លោកបានពិភាក្សារឿងនេះជាមួយលោក Zelenskiy និងសម្ព័ន្ធមិត្តផ្សេងទៀត ហើយចក្រភពអង់គ្លេស នឹង «រួមចំណែកយ៉ាងពេញលេញ»៕