កងទ័ពជើងទឹកហ្វីលីពីន នៅថ្ងៃសុក្រ (ទី១៧ ខែមករា) នេះ បានប្រាប់ឲ្យដឹងថា នាវារបស់ខ្លួន កំពុងធ្វើសមយុទ្ធនៅជិតតំបន់ថ្មប៉ប្រះទឹក ក្នុងសមុទ្រចិនខាងត្បូង ដែលការហ្វឹកសមនេះកើតមានឡើងមួយថ្ងៃបន្ទាប់ពីទីក្រុងម៉ានីល និងទីក្រុងប៉េកាំង បានព្រមព្រៀងគ្នាស្វែងរកមូលដ្ឋានរួម និងរិះរកមធ្យោបាយ ដើម្បីធ្វើសហប្រតិបត្តិការ ទោះបីជាជម្លោះនៅបន្តមានក៏ដោយ។

កងទ័ពជើងទឹក បានឲ្យដឹងនៅក្នុងសេចក្តីថ្លែងការណ៍ថា សមយុទ្ធនៅជុំវិញតំបន់ថ្មប៉ប្រះទឹក Scarborough នេះ ដែលជាតំបន់ប្រទាញប្រទង់ដ៏ក្តៅគគុកបំផុតមួយរបស់អាស៊ី គឺមានគោលបំណងពង្រឹងសមត្ថភាពរបស់កងទ័ពជើងទឹក ដើម្បីធានាបាននូវអ្វីដែលខ្លួនបាននិយាយថា ជាដែនទឹកហ្វីលីពីន និងបូរណភាពដែនដីរបស់ប្រទេស។

កងទ័ពបានពិពណ៌នាថា នេះគឺជា «សមយុទ្ធឯកតោភាគីតាមទម្លាប់» ដែលពាក់ព័ន្ធនឹងនាវាចម្បាំង Antonio Luna និងនាវាល្បាត ២គ្រឿងផ្សេងទៀតរបស់ខ្លួន ដែលកំពុងប្រតិបត្តិការ នៅក្នុងតំបន់សេដ្ឋកិច្ចផ្តាច់មុខ (EEZ) របស់ប្រទេសហ្វីលីពីន។ សមយុទ្ធនេះនឹងធ្វើឡើងចាប់ពីថ្ងៃទី១៧ ដល់ទី១៩ ខែមករា។

គួរបញ្ជាក់ថា សមយុទ្ធនេះកើតមានឡើងស្របគ្នានឹងការតវ៉ាតាមវិទ្យុទាក់ទងដែលកំពុងបន្តធ្វើដោយឆ្មាំល្បាតឆ្នេរហ្វីលីពីន ចំពោះវត្តមាននៃនាវាឆ្មាំល្បាតឆ្នេរដ៏ធំបំផុតរបស់ចិន នៅតំបន់នេះ ដែលកងទ័ពនិយាយថា កំពុងល្បាតដោយខុសច្បាប់ នៅក្នុង EEZ របស់ទីក្រុងម៉ានីល។

ស្ថានទូតចិន ប្រចាំនៅទីក្រុងម៉ានីល មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយទេ នៅថ្ងៃសុក្រនេះ៕