កងកម្លាំងការពារដែនអាកាសអ៊ុយក្រែន នៅថ្ងៃសុក្រ (ទី១៧ ខែមករា) នេះ បានឲ្យដឹងថា ខ្លួនបានបាញ់ទម្លាក់យានដ្រូនចំនួន ៣៣គ្រឿង ក្នុងចំណោម ៥០គ្រឿង ដែលត្រូវបានបាញ់បង្ហោះដោយរុស្ស៊ីពេញមួយយប់។

កងកម្លាំងនេះបានប្រាប់ទៀតថា យានដ្រូនចំនួន ៩គ្រឿង ត្រូវបាន «បាត់ដាន» ដោយនិយាយយោងទៅដល់ការប្រើប្រាស់សង្រ្គាមអេឡិចត្រូនិករបស់អ៊ុយក្រែន ដើម្បីប្ដូរទិសដៅរបស់យានដ្រូនរុស្ស៊ី ខណៈដែល ១គ្រឿង បានហោះចេញពីអ៊ុយក្រែនសំដៅទៅប្រទេសរ៉ូម៉ានី។

យ៉ាងណាក្ដី ការខូចខាតក៏កើតមានដែរ ដោយយោធាបានឲ្យដឹងនៅលើកម្មវិធីផ្ញើសារ Telegram ថា៖ «យានដ្រូនវាយប្រហារអរិភាព បានវាយប្រហារសហគ្រាស នៅក្នុងតំបន់ Odesa ហើយអគារនៃស្ថាប័ននានា អាជីវកម្មឯកជន និងផ្ទះសម្បែង នៅក្នុងតំបន់ Kharkiv, Cherkasy និងគីវ ត្រូវរងការខូចខាតយ៉ាងដំណំ ដោយសារតែយានដ្រូនរបស់សត្រូវធ្លាក់ចំ»។

យោធាបានបន្ថែមថា ហេដ្ឋារចនាសម្ព័ន្ធកំពង់ផែ នៅក្នុងតំបន់ Danube បានរងការវាយប្រហារ។ ចំណែកមន្ត្រីប្រចាំតំបន់គីវ បាននិយាយថា កុមារម្នាក់ បានរងរបួស ដោយសារការធ្លាក់បំណែកពីយានដ្រូនដែលត្រូវបានបាញ់ទម្លាក់ ក្នុងអំឡុងពេលមានវាយប្រហារមួយ៕