បាត់ដំបង ៖ រសៀល​ថ្ងៃទី១៧ ខែមករា ឆ្នាំ២០២៥ វេលាម៉ោង ១៥:១៥នាទី មានករណីរថយន្តដឹកដំឡូងក្នុងចម្ការប៉ះមីនតោនផ្ទុះ ស្ថិត​នៅភូមិកូនភ្នំខាងត្បូង ឃុំតាស្ដា ស្រុកសំពៅលូន ខេត្តបាត់ដំបង បណ្ដាលឱ្យអ្នកបើកបរឈ្មោះ ថៃ សឿន ភេទប្រុស អាយុ ៤២ឆ្នាំ មានទីលំនៅភូមិកូនភ្នំខាងត្បូង ឃុំតាស្ដា រងរបួសជើងទាំងសងខាង និងក្បាល។ បច្ចុប្បន្នជនរងគ្រោះបានបញ្ជូនទៅសង្គ្រោះនៅមន្ទីរពេទ្យបង្អែកខេត្តបាត់ដំបង។

ឯកឧត្តមទេសរដ្ឋមន្រ្តី លី ធុជ តាងនាម​សម្តេច​ធិបតី​ ហ៊ុន​ ម៉ាណែត​ នាយករដ្ឋមន្ត្រី​ និង​ជា​ប្រធាន​អាជ្ញាធរ​មីន​ បាន ចូលរួម​សម្តែង​នូវ​ការសោកស្ដាយ​ចំពោះ​ឧបទ្ទវហេតុ​ផ្ទុះមីននេះ​ ដែល​បណ្ដាល​ឲ្យ​រងរបួស​ និង​ខូចខាត​ដល់​ទ្រព្យ​សម្បត្តិ​។

ឯកឧត្តមទេសរដ្ឋមន្ត្រី បានអំពាវនាវដល់បងប្អូនប្រជាពលរដ្ឋទាំងអស់​ សូមកុំចូលទៅតំបន់ណាដែលមិនដឹង​ប្រវត្តិច្បាស់​លាស់​ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោស​សម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល។