ឯកឧត្តម ហេង រតនា ប្រតិភូរាជរដ្ឋាភិបាល​ទទួល​បន្ទុក​ជា​អគ្គនាយក នៃ​មជ្ឈមណ្ឌល​កំចាត់​មីន​កម្ពុជា (ស៊ីម៉ាក់) បានដឹកនាំគណៈប្រតិភូថ្នាក់ដឹកនាំអង្គភាព CMAC​ ចូលរួម​គោរព​វិញ្ញាណក្ខន្ធ​សព​លោក​ ពៅ​ នេពីន អត្តលេខ៩៣៦៤៨៦​ ស្ថិតនៅភូមិតេជោ​ ឃុំភ្នំឆ័ត្រ​ ស្រុកស្វាយចេក​ ខេត្ត​បន្ទាយ​មានជ័យ​ និងសពលោក អឿន​ ចាន់ដារ៉ា​ អត្តលេខ៩៣៦៤៩៣​ ស្ថិតនៅភូមិស្នឹង​ ឃុំស្នឹង​ ស្រុកបាណន់​ ខេត្តបាត់ដំបង​ ដែលបានពលីក្នុងឧបទ្ទវហេតុផ្ទុះគ្រាប់មីនតោន​ ក្នុងកិច្ច​ប្រតិបត្តិការ​បោស​សម្អាត​មីន​រំដោះដី​ស្រែ​ប្រជាពលរដ្ឋស្ថិតនៅភូមិត្រពាំងប្រីយ៍​ ឃុំបាក់អន្លូង​ ស្រុក​ត្រពាំង​ប្រាសាទ​ ខេត្តឧត្តរមានជ័យកាលពីថ្ងៃទី១៦​ ខែមករា​ ឆ្នាំ២០២៥

កន្លង​មក​នេះ។

ថ្នាក់ដឹកនាំមន្ត្រីបុគ្គលិកអង្គភាពCMAC ឧទ្ទិសបួងសួងឲ្យវិញ្ញាណក្ខន្ធ​លោក​ អឿន ចាន់តារា និង​លោក​ ពៅ​ នេពីន បានទៅកាន់ឋានសុខគតិភពកុំបី​ឃ្លៀងឃ្លាតឡើយ។ ក្នុងនាម​ជា​ថ្នាក់​ដឹក​នាំព្រ​ម​ទាំង​មន្ត្រីបុគ្គលិកអង្គភាពCMACទាំងមូល ក្រៅពីមានការ​សោក​ស្ដាយ​យ៉ាង​ពន់​ពេក​ចំពោះ​ហេតុ​ការណ៍​គ្រោះថ្នាក់បាត់បង់ជីវិតក្នុងឧបទ្ទវហេតុផ្ទុះមីនអំឡុងពេលកំពុងប្រតិបត្តិការ បោស​សម្អាត​មីន​នោះ ឯកឧត្តម ហេង រតនា ក៏សូមថ្លែងអំណរគុណ​យ៉ាង​ជ្រាល​ជ្រៅ​បំផុត​ជូន​ចំពោះឪ​ពុក​ម្តាយ​​ជីដូន​ជីតា បងប្អូន​ កូនរបស់លោក​ ពៅ​ នេពីន​និង លោក​ អឿនចាន់តារា ដែល​បាន​ចូល​រួម​ចំណែក​​លះបង់ និងធ្វើ​ពលីកម្មជាមួយរាជរដ្ឋាភិបាល និងអង្គភាពCMAC ដើម្បី​បុព្វហេតុ​សុខ​សន្តិភាព​​ សុវត្ថិភាព​ និងការអភិវឌ្ឍនៃសង្គមជាតិ​ លើ​សមរភូ​មិ​បោស​សម្អាត​ឃាតករ​លាក់​មុខ​គ្រាប់​មីន និង​សំណល់យុទ្ធភណ្ឌសង្គ្រាម ។

ឯកឧត្តម ហេង រតនា ប្រតិភូរាជរដ្ឋា ភិបាល​ទទួលបន្ទុក​ជា​អគ្គនាយក នៃ​មជ្ឈមណ្ឌល​កំចាត់​មីន​កម្ពុជា (ស៊ីម៉ាក់) បានបញ្ជាក់ថា សង្គ្រាមបានបញ្ចប់! ប្រទេសជាតិមានសន្តិភាពពេញលេញ​អស់​រយៈ​ពេលជាង២៦ឆ្នាំហើយ​ ប៉ុន្តែសំណល់សង្គ្រាមដូចជាគ្រាប់មីន​ គ្រាប់បែកចង្កោម​ គ្រាប់​បែក​ទម្លាក់​ពីយន្តហោះ​ គ្រាប់បែកគីមី​ និងអាវុធជាតិផ្ទុះជាច្រើនប្រភេទ​នៅសេស​សល់​រាយ​ប៉ាយ​កប់​ក្នុង​ដី​ ក្នុងទឹក​ តាមភូមិករ​ តាមព្រៃប្រឹក្សានៃទឹកដីព្រះរាជាណាចក្រដ៏កំសត់នេះនៅឡើយ​។ រាជរ​ដ្ឋាភិបាល​បានបន្តខិតខំបោសសម្អាត និង​កម្ចាត់​ចោល​សំណល់​យុទ្ធ​ភណ្ឌ​សង្គ្រាម​ដោយ​ឆន្ទះ​មុត​ស្រួច​ ដើម្បីធានានូវសុខសន្តិភាព និងការអភិវឌ្ឍសង្គមជាតិ៕ អត្ថបទ៖ ភារម្យ