ប្រធានាធិបតីជាប់ឆ្នោតសហរដ្ឋអាមេរិក លោក Donald Trump បានជួបសន្ទនាតាមទូរស័ព្ទជាមួយប្រធានាធិបតីចិន លោក Xi Jinping។ របៀបវារៈរបស់មេដឹកនាំទាំងពីររួមមាន សេដ្ឋកិច្ច ពាណិជ្ជកម្ម និងវេទិកាបណ្តាញផ្សព្វផ្សាយសង្គម TikTok។ 

ក្រសួងការបរទេសចិន និយាយថា លោក Xi បានពិពណ៌នាអំពីលក្ខណៈនៃទំនាក់ទំនងសេដ្ឋកិច្ច និងពាណិជ្ជកម្មរវាងចិន-អាមេរិក ថា «ឈ្នះ-ឈ្នះ»។ លោក ក៏បាននិយាយផងដែរថា ភាគីទាំងពីរ មិនគួរជ្រើសរើសការប្រឈមមុខដាក់គ្នា និងជម្លោះនោះទេ។

លោក ស៊ី បាននិយាយថា កោះតៃវ៉ាន់ គឺជាបញ្ហាព្រួយបារម្ភអំពីអធិបតេយ្យភាព និងបូរណភាពទឹកដីរបស់ចិន។ លោក បានជំរុញឲ្យទីក្រុងវ៉ាស៊ីនតោន ដោះស្រាយបញ្ហាកោះនេះ «ដោយប្រយ័ត្នប្រយែង»។ ក្រសួងបាននិយាយថា លោក Xi និងលោក Trump បានព្រមព្រៀងបង្កើតបណ្តាញទំនាក់ទំនងជាយុទ្ធសាស្ត្រ ដើម្បីពិភាក្សាអំពីបញ្ហាទ្វេភាគីសំខាន់ៗ។ ចំណាត់ការនេះ ជាក់ស្តែងបង្ហាញឱ្យឃើញថា ទីក្រុងប៉េកាំង ស្វែងរកការកសាងទំនាក់ទំនងដោយស្ថិរភាពជាមួយរដ្ឋបាលរបស់សហរដ្ឋអាមេរិក ដែលចូលកាន់តំណែងនៅពេលប៉ុន្មានថ្ងៃខាងមុខនេះ។ នៅក្នុងការបង្ហោះលើបណ្តាញផ្សព្វផ្សាយសង្គម លោក Trump បានចាត់ទុកកិច្ចសន្ទនាតាមទូរស័ព្ទថា «ពិតជាល្អប្រសើរ» សម្រាប់ប្រទេសទាំងពីរ។

ប្រធានាធិបតីដែលនឹងចូលកាន់តំណែងនៅពេលខាងមុខបាននិយាយថា លោករំពឹងថា អាមេរិកនិងចិន នឹងចាប់ផ្តើមដោះស្រាយបញ្ហាជាច្រើនរួមគ្នាឆាប់ៗ។ លោកនិយាយបន្ថែមថា «ប្រធានាធិបតី លោក Xi និងលោក នឹងធ្វើអ្វីៗគ្រប់យ៉ាងដែលអាចធ្វើទៅបាន ដើម្បីធ្វើឱ្យពិភពលោកកាន់តែមានសន្តិភាពនិងសុវត្ថិភាព»។

ប្រធានាធិបតីជាប់ឆ្នោតក៏បាននិយាយថា ភាគីទាំងពីរ បានពិភាក្សាអំពីតុល្យភាពពាណិជ្ជកម្ម សារធាតុញៀនហ្វង់តានីល និងបណ្តាញសង្គម TikTok ផងដែរ។

ច្បាប់ដើម្បីដាក់បម្រាមយ៉ាងមានប្រសិទ្ធភាពលើកម្មវិធីចែករំលែកវីដេអូដ៏ពេញនិយម ត្រូវបានកំណត់ឱ្យចូលជាធរមាននៅសហរដ្ឋអាមេរិក នៅថ្ងៃអាទិត្យ លុះត្រាតែក្រុមហ៊ុនមេដែលមានមូលដ្ឋាននៅប្រទេសចិន ByteDance អាចលក់កម្មវិធី នៅពេលនោះ។