កម្មវិធីប្រគល់ពានរង្វាន់បុគ្គលឆ្នើមក្នុងការងារអភិរក្សទន្លេមេគង្គជំនាន់ទី៣ ឆ្នាំ២០២៣-២០២៤ បានប្រគល់ពានរង្វាន់ជូនដល់ បុគ្គលឆ្នើមចំនួន ៦រូប។ បុគ្គលទាំង ៦រូបនេះ មានជាតិសាសន៍ផ្សេងគ្នា ក្នុងនោះមានជនជាតិថៃមួយរូប ឡាវ ១រូប វៀតណាមមួយរូប និងជនជាតិកម្ពុជាចំនួន ៣រូប។

គម្រោងអច្ឆរិយភាពនៃទន្លេមេគង្គ ក្រោមជំនួយឧបត្ថម្ភពីទីភ្នាក់ងារ USAID បានប្រគល់ពានរង្វាន់បុគ្គលឆ្នើមក្នុងការងារអភិរក្សទន្លេមេគង្គសម្រាប់ឆ្នាំ ២០២៣-២០២៤។ លោកស្រី ជា សីលា ជាប្រធានគម្រោងអច្ឆរិយភាពនៃទន្លេមេគង្គ មានប្រសាសន៍ថា “នេះជាលើកទីបីហើយដែលគម្រោងអច្ឆរិយភាព នៃទន្លេមេគង្គក្រោមកិច្ចសហប្រតិបត្តិការយ៉ាងស្និទ្ធស្នាលជាមួយរដ្ឋបាលជលផលនិងសាកលវិទ្យាល័យភូមិន្ទកសិកម្ម ជ្រើសរើសបុគ្គលឆ្នើមក្នុងការងារអភិរក្សទន្លេមេគង្គ។ ជំនាន់ទី៣នេះ គឺយើងបានពង្រីកវិសាលភាពរបស់កម្មវិធី ដោយមានបុគ្គលឆ្នើមមកពីប្រទេសផ្សេងទៀតក្នុងអាងទន្លេមេគង្គ។

ជំនាន់នេះយើងមានបុគ្គលឆ្នើមចំនួនបីរូបជាជនជាតិកម្ពុជា មួយរូបមកពីប្រទេសថៃ មួយរូបមកពីប្រទេសឡាវ មួយរូបទៀតមកពីប្រទេសវៀតណាម ដែលសុទ្ធសឹងតែធ្វើការងារស្រាវជ្រាវការងារអភិរក្ស ការងារគ្រប់គ្រងធនធានធម្មជាតិ ដែលមានដូចជា សត្វស្លាបទឹក សត្វខ្សឹប សត្វផ្សោតក្បាលត្រឡោក ប្រភេទត្រីងាយរងគ្រោះ សហគមន៍អេកូទេសចរណ៍ផ្សោត ។ កម្មវិធីបុគ្គលឆ្នើមក្នុងការងារអភិរក្សទន្លេមេគង្គមិនមែនគ្រាន់តែបង្ហាញពីបុគ្គលដែលជាបុគ្គលឆ្នើមប៉ុណ្ណោះទេ តែបង្កើនការផ្សព្វផ្សាយពីកិច្ចការដែលពួកគាត់បាននិងកំពុងធ្វើ និងការចូលរួមចំណែកអ្វីខ្លះក្នុងការការពារធនធានធម្មជាតិក្នុងអនុតំបន់ទន្លេមេគង្គ”។

លោក ស៊ុំ ភារុណ ជាបុគ្គលឆ្នើមក្នុងការងារអភិរក្សទន្លេមេគង្គ និងជាអ្នកជំនាញការងារអភិរក្សសត្វស្លាប ដែលទទួលបានពានរង្វាន់នៅថ្ងៃនេះ ជាបុគ្គលមួយរូបដែលបានបំពេញការងារក្នុងកិច្ចការពារ អភិរក្សនៅតំបន់ទន្លេមេគង្គរយៈពេលជិត ២០ ឆ្នាំមកហើយ។ លោកបានបំពេញការងារជាច្រើន ក្នុងជីវិតការងារ ដោយបានដើរតួយ៉ាងសំខាន់ក្នុងការរៀបចំយុទ្ធសាស្រ្តអភិរក្សនៅកម្ពុជា។ លោកក៏បានដឹកនាំគម្រោងអភិរក្សសត្វត្មាតកម្ពុជា បង្កើតផែនការសកម្មភាពរយៈពេលដប់ឆ្នាំដើម្បីការពារប្រភេទសត្វជិតផុតពូជទាំងនេះផងដែរ។

ក្នុងការទទួលបានពានរង្វាន់នាពេលនេះ លោកពិតជាមានក្ដីរំភើបចំពោះការផ្ដល់តម្លៃលើកិច្ចប្រឹងប្រែងរបស់លោក។ ពានរង្វាន់នេះ នឹងក្លាយជាកម្លាំងចិត្តបន្ថែមទៀត សម្រាប់គាត់ក្នុងការបន្តកិច្ចការងារអភិរក្សធនធានធម្មជាតិ។

គម្រោងអច្ឆរិយភាពនៃទន្លេមេគង្គ ស្ថិតក្រោមជំនួយឧបត្ថម្ភពីទីភ្នាក់ងារ USAID។ គម្រោងអច្ឆរិយៈនៃទន្លេមេគង្គមានគោលបំណងអភិរក្សអេកូឡូស៊ី និងបេតិកភណ្ឌវប្បធម៌នៃទន្លេមេគង្គ។ តាមរយៈការរួមបញ្ចូលវិទ្យាសាស្ត្រ ការអប់រំ និងការចូលរួមសហគមន៍ គម្រោងនេះជូនដំណឹងអំពីគោលនយោបាយ និងជំរុញការអនុវត្តប្រកបដោយនិរន្តរភាព ដើម្បីផ្តល់អត្ថប្រយោជន៍ដល់បរិស្ថាន និងប្រជាជនក្នុងតំបន់៕ អត្ថបទ៖ គឹមហុក