រដ្ឋអាជ្ញាតុលាការព្រហ្មទណ្ឌអន្តរជាតិ(ICC) លោក Karim Khan បានការពារសេចក្តីសម្រេចរបស់លោក ក្នុងការនាំយកការចោទប្រកាន់ពីបទឧក្រិដ្ឋកម្មសង្គ្រាមប្រឆាំងនាយករដ្ឋមន្ត្រីអ៊ីស្រាអែល ដោយនិយាយថា អ៊ីស្រាអែល ពុំបានខិតខំពិតប្រាកដ ចំពោះការស៊ើបអង្កេតបទចោទប្រកាន់ នេះទេ។

នៅក្នុងបទសម្ភាសន៍ជាមួយសារព័ត៌មានរ៉យទ័រ លោកបានឈរលើសេចក្តីសម្រេចរបស់លោក ជុំវិញដីកាចាប់ខ្លួន ទោះបីជាមានការបោះឆ្នោតកាលពីសប្តាហ៍មុន ដោយសភាសហរដ្ឋអាមេរិក ដើម្បីដាក់ទណ្ឌកម្មលើតុលាការ ICC ជាការតវ៉ាក៏ដោយ ជាចំណាត់ការមួយដែលលោកបានពិពណ៌នាថា «មិនចង់បាន និងមិនត្រូវបានស្វាគមន៍»។

ចៅក្រមតុលាការ ICC បានចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក Benjamin Netanyahu អតីតរដ្ឋមន្ត្រីការពារជាតិអ៊ីស្រាអែលលោក Yoav Gallant និងមេដឹកនាំក្រុមហាម៉ាស លោក Ibrahim Al-Masri កាលពីខែវិច្ឆិកាឆ្នាំមុន ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ក្នុងអំឡុងពេលជម្លោះនៅតំបន់ហ្កាហ្សា។

អ៊ីស្រាអែល បានច្រានចោលអំណាចរបស់តុលាការដែលមានមូលដ្ឋាននៅទីក្រុងឡាអេ និងបដិសេធចំពោះឧក្រិដ្ឋកម្មសង្គ្រាម។ 

សហរដ្ឋអាមេរិក ដែលជាសម្ព័ន្ធមិត្តដ៏សំខាន់របស់អ៊ីស្រាអែល ក៏ពុំមែនជាសមាជិកនៃតុលាការ ICC ដែរ ហើយទីក្រុងវ៉ាស៊ីនតោន បានរិះគន់ដីកាចាប់ខ្លួនលោក Netanyahu និងលោក Gallant ។