លោក Timur Tkachenko ប្រធានរដ្ឋបាលយោធានៃរដ្ឋធានីរបស់ប្រទេសអ៊ុយក្រែន បាននិយាយថា មនុស្សបួននាក់ ត្រូវបានសម្លាប់ នាព្រឹកថ្ងៃសៅរ៍ (ទី១៨ ខែមករា) នេះ នៅកណ្តាលទីក្រុងគីវ អំឡុងពេលមានការវាយប្រហាររបស់រុស្ស៊ី នាពេលយប់។

លោក Tkachenko បានបង្ហោះនៅលើកម្មវិធីផ្ញើសារ Telegram ថា ការបាត់បង់ជីវិត បានកើតមាននៅក្នុងសង្កាត់ Shevchenkivskyi របស់ទីក្រុងនេះ។ ជាមួយគ្នានេះ លោកបានប្រាប់ទៀតថា បំណែកកម្ទេចកម្ទី ក៏បានធ្លាក់ចំសង្កាត់ Holosiivskyi នៅច្រាំងខាងលិចនៃទន្លេ Dnipro ដែលហូរកាត់រដ្ឋធានី និងចំសង្កាត់ Desnyanskyi នៅច្រាំងទន្លេម្ខាងទៀត។

ទូរទស្សន៍សាធារណៈ Suspilne បានបង្ហោះនៅលើ Telegram បង្ហាញពីរូបភាពនៃក្រុមសង្គ្រោះបន្ទាន់ដែលកំពុងធ្វើការ ចំពេលមានគំនរកញ្ចក់ដែលបែកខ្ចាត់ខ្ចាយ។ អភិបាលក្រុងគីវ លោក Vitali Klitschko បាននិយាយថា ប្រព័ន្ធការពារដែនអាកាស កំពុងប្រតិបត្តិការ នៅជុំវិញទីក្រុង។

លោក Klitschko បាននិយាយថា បង្អួចកញ្ចក់នៃអាគារនានា ត្រូវបានធ្វើឲ្យបែកខ្ចាត់ខ្ចាយ នៅក្នុងសង្កាត់ Shevchenkivskyi ក្នុងនោះរួមទាំងនៅស្ថានីយ៍រថភ្លើងក្រោមដីដែលត្រូវបានបិទផងដែរ។ លោកបានបន្ថែមថា មានផ្សែងហុយចេញពីអគារផ្ទះល្វែង ហើយក្រុមអ្នកជួសជុលត្រូវបានបញ្ជូនទៅជួសជុលបំពង់ទឹកមេដែលរងការខូចខាត។

អាជ្ញាធរបានព្រមានពីគ្រោះថ្នាក់ពីយានដ្រូន និងមីស៊ីលវាយប្រហារ នៅមុនពេលដល់មានការវាយប្រហារនោះ។ ការប្រកាសអាសន្នពីការវាយប្រហារផ្លូវអាកាស នៅរដ្ឋធានី ត្រូវបានលុបចោល បន្ទាប់ពីដាក់ចេញជាង ១ម៉ោង៕