រដ្ឋមន្ត្រីការបរទេសម៉ាឡេស៊ី លោក Datuk Seri Mohamad Hasan នឹងធ្វើជាប្រធាននៃកិច្ចប្រជុំរដ្ឋមន្ត្រីការបរទេសអាស៊ាន (AMM Retreat) នៅថ្ងៃអាទិត្យ (ទី១៩ ខែមករា) ជាថ្ងៃដែលរដ្ឋមន្ត្រីទាំងអស់នឹងពិភាក្សាគ្នាយ៉ាងទូលំទូលាយ អំពីបញ្ហាទាំងក្នុងតំបន់ និងអន្តរជាតិ។

តាមរយៈសេចក្តីថ្លែងការណ៍របស់ខ្លួន ក្រសួងការបរទេសម៉ាឡេស៊ី បានឲ្យដឹងថា ការជួបប្រជុំគ្នានេះ ក៏នឹងពិភាក្សាផងដែរ អំពីទិសដៅយុទ្ធសាស្ត្ររបស់សមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) ជាកិច្ចប្រឹងប្រែង ដើម្បីពង្រឹងសហគមន៍អាស៊ាន និងទំនាក់ទំនងខាងក្រៅរបស់អាស៊ាន។

សេចក្ដីថ្លែងការណ៍នោះ បានរៀបរាប់ថា៖ «រដ្ឋមន្ត្រីការបរទេសអាស៊ាន នឹងផ្លាស់ប្តូរទស្សនៈគ្នា ស្តីអំពីស្ថានភាពវិវត្តន៍នានា នាពេលបច្ចុប្បន្ន ទាំងបញ្ហា ក្នុងតំបន់ និងអន្តរជាតិ ក្នុងនោះរួមទាំងវិបត្តិ នៅសហភាពមីយ៉ាន់ម៉ា ភាពតានតឹងភូមិសាស្ត្រនយោបាយ និងបញ្ហាប្រឈមផ្សេងទៀតដែលប៉ះពាល់ដល់សន្តិភាព និងស្ថិរភាព ក្នុងតំបន់»។

សេចក្តីថ្លែងការណ៍ បានបន្ថែមថា៖ «រដ្ឋមន្ត្រីការបរទេសនៃប្លុកនេះ ក៏នឹងឆ្លៀតឱកាសផងដែរ ដើម្បីមានជំនួបទ្វេភាគីជាមួយសមភាគីរបស់ប្រទេសរៀងៗខ្លួន ដែលធ្វើឡើងក្នុងគោលបំណងពិភាក្សា អំពីបញ្ហាទាក់ទងនឹងការពង្រឹងអាស៊ាន និងទំនាក់ទំនងទ្វេភាគី«។

កិច្ចប្រជុំ AMM Retreat នឹងមានការចូលរួមពីរដ្ឋមន្ត្រីការបរទេស និងមន្ត្រីជាន់ខ្ពស់មកពីរដ្ឋសមាជិកអាស៊ាន។ រដ្ឋមន្ត្រីការបរទេសទីម័រខាងកើត នឹងចូលរួមក្នុងនាមជាអ្នកសង្កេតការណ៍អាស៊ាន។ ហើយក៏មានការចូលរួមផងដែរពីអគ្គលេខាធិការអាស៊ាន លោកបណ្ឌិត កៅ គឹមហួន និងតំណាងមកពីសហភាពមីយ៉ាន់ម៉ា។

ជាមួយគ្នានេះ អំឡុងពេលនៃការកិច្ចប្រជុំនេះ ក្រសួងបានបញ្ជាក់ថា ប្រទេសម៉ាឡេស៊ី នឹងបង្ហាញអំពីវិស័យ និងគោលដៅជាអាទិភាព សម្រាប់ការធ្វើជាប្រធានរបស់ខ្លួន ក្រោមប្រធានបទ «ការរួមបញ្ចូល និងនិរន្តរភាព»៕