ប្រជាជនអ៊ីស្រាអែលនៅទីក្រុង Tel Aviv បានស្វាគមន៍ការយល់ព្រមពីគណៈរដ្ឋមន្ត្រី ចំពោះកិច្ចព្រមព្រៀងជាមួយក្រុមសកម្មប្រយុទ្ធហាម៉ាសប៉ាឡេស្ទីន ដើម្បីឲ្យមានបទឈប់បាញ់ និងការដោះលែងចំណាប់ថ្នូរ នៅតំបន់ហ្កាហ្សាស្ទ្រីប។

ប្រជាជនអ៊ីស្រាអែលជាច្រើនដែលបានចាប់ផ្តើមថ្ងៃថ្មីរបស់ពួកគេ នាថ្ងៃសៅរ៍ (ទី១៨ ខែមករា) ដោយការរត់ហាត់ប្រាណតិចៗ នៅក្បែរឆ្នេរនៃទីក្រុង Tel Aviv បាននិយាយថា កិច្ចព្រមព្រៀងនេះ នឹងនាំឲ្យចំណាប់ថ្នូរបានវិលត្រលប់ទៅជួបជុំក្រុមគ្រួសាររបស់ពួកគេវិញ។

គួរបញ្ជាក់ថា នៅព្រឹកព្រលឹមថ្ងៃសៅរ៍នេះ បន្ទាប់ពីមានកិច្ចប្រជុំអស់រយៈពេលជាង ៦ម៉ោង រដ្ឋាភិបាលបានផ្តល់សច្ចាប័នលើកិច្ចព្រមព្រៀងដែលអាចបើកផ្លូវឲ្យមានការបញ្ចប់សង្រ្គាមរយៈពេល ១៥ខែ នៅក្នុងដែនដីប៉ាឡេស្ទីនដែលក្រុមហាម៉ាសគ្រប់គ្រង។

បន្ទាប់ពីគណៈរដ្ឋមន្ត្រីអ៊ីស្រាអែលបានអនុម័តយល់ព្រម អ្នកចរចារបស់អាមេរិក លោក Brett McGurk បាននិយាយថា ផែនការនេះកំពុងដំណើរការទៅមុខ តាមការគ្រោងទុក។

អ្នកនាំពាក្យក្រសួងការបរទេសកាតា បានបង្ហោះនៅលើបណ្ដាញសង្គម X ថា បទឈប់បាញ់នេះ នឹងចូលជាធរមាន នៅម៉ោង ៦:៣០ ម៉ោងសកល នាថ្ងៃអាទិត្យ (ទី១៩ ខែមករា)។ ហើយសេតវិមានរំពឹងថា ចំណាប់ថ្នូរជាស្ត្រី ៣នាក់ នឹងត្រូវបានដោះលែងឲ្យធ្វើដំណើរទៅអ៊ីស្រាអែល នាពេលរសៀល តាមរយៈកាកបាទក្រហម។

នៅក្រោមកិច្ចព្រមព្រៀងនេះ បទឈប់បាញ់ ៣ដំណាក់កាល ត្រូវចាប់ផ្តើមជាមួយនឹងដំណាក់កាលដំបូងរយៈពេល ៦សប្តាហ៍ នៅពេលដែលចំណាប់ថ្នូរដែលក្រុមហាម៉ាសឃុំខ្លួន នឹងត្រូវបានដោះដូរជាមួយអ្នកទោស និងអ្នកជាប់ឃុំ ក្នុងពន្ធនាគាររបស់ប្រទេសអ៊ីស្រាអែល៕