អ្នកគាំទ្រ ចំពោះប្រធានាធិបតីកូរ៉េខាងត្បូង លោក Yoon Suk Yeol ដែលត្រូវបានចោទប្រកាន់ទម្លាក់តំណែង បានប្រមូលផ្តុំគ្នាក្នុងចំនួនដ៏ច្រើន នាថ្ងៃសៅរ៍ (១៨ មករា) នៅខាងក្រៅបរិវេណតុលាការសង្កាត់ខាងលិចនៃទីក្រុងសេអ៊ូល ខណៈដែលលោក Yoon បានចូលរួមសវនាការ ដើម្បីតតាំងនឹងសំណើរបស់អង្កភាពស៊ើបអង្កេត ដែលសុំបន្តឃុំខ្លួនលោក។

បាតុករខ្លះនាំគ្នាឡើងទៅឈរនៅលើរបងខណ្ឌចែកបរិវេណតុលាការ ខណៈពួកគេស្រែក កាន់បដា ហើយគ្រវីទង់ជាតិអាមេរិក និងកូរ៉េខាងត្បូង។

ពួកគេជាច្រើនបាននិយាយថា ការចាប់ខ្លួន និងស៊ើបអង្កេត ចំពោះលោក Yoon ពាក់ព័ន្ធនឹងការប្រកាសច្បាប់អាជ្ញាសឹករបស់លោក កាលពីថ្ងៃទី៣ ខែធ្នូ គឺខុសច្បាប់ ហើយបានខ្ចីពាក្យស្លោក «Stop the Steal» (បញ្ឈប់ការលួច) ដែលប្រើដោយអ្នកគាំទ្រអតីតប្រធានាធិបតីអាមេរិក លោក Donald Trump បន្ទាប់ពីចាញ់ការបោះឆ្នោតឆ្នាំ២០២០ ដែលពេលនោះប្រធានាធិបតីអាមេរិក លោក Joe Biden ជាអ្នកឈ្នះ។

ជាផ្នែកនៃកុ្រមអ្នកគាំទ្រលោក Yoon ដែលប្រមូលផ្តុំគ្នានៅខាងក្រៅតុលាការ អ្នកតវ៉ាឈ្មោះ Lee Se-Ban អាយុ ៣០ឆ្នាំ បាននិយាយថា៖ «មានអ្នកគាំទ្រលោកប្រធានាធិបតី Yoon Suk Yeol ច្រើនណាស់ នៅជុំវិញតុលាការ ដែលនៅតែជឿជាក់លើនីតិរដ្ឋ និងការការពារប្រធានាធិបតី»។

នាព្រឹកថ្ងៃសៅរ៍នេះ អ្នកគាំទ្រលោក Yoon ជាច្រើននាក់ បានជួបជុំគ្នានៅទីលាន Gwanghwamun ជាការប្រមូលផ្តុំដ៏ធំ ដើម្បីគាំទ្រប្រធានាធិបតីដែលត្រូវបានចោទប្រកាន់ទម្លាក់តំណែង៕