ប្រមុខក្រុមហេសបូឡា លោក Naim Qassem បានអបអរសាទរប៉ាឡេស្ទីន នាថ្ងៃសៅរ៍ (ទី១៨ ខែមករា) ជុំវិញការមានកិច្ចព្រមព្រៀងបទឈប់បាញ់ នៅតំបន់ហ្កាហ្សា ដោយបាននិយាយនៅក្នុងសុន្ទរកថាថា នេះបង្ហាញពី «ភាពអត់ធ្មត់នៃការប្រឹងតស៊ូ» ប្រឆាំងនឹងអ៊ីស្រាអែល។

ការកត់សម្គាល់នេះ គឺជាការលើកឡើងជាសាធារណៈលើកដំបូងរបស់មេដឹកនាំក្រុមសកម្មប្រយុទ្ធលីបង់ដែលគាំទ្រដោយអ៊ីរ៉ង់ ចាប់តាំងពីអ៊ីស្រាអែល និងក្រុមហាម៉ាស បានឈានដល់កិច្ចព្រមព្រៀង កាលពីថ្ងៃពុធ (ទី១៥ ខែមករា)។

លោកបាននិយាយថា៖ «កិច្ចព្រមព្រៀងនេះដែលមិនមានអ្វីផ្លាស់ប្តូរពីការស្នើឡើង ក្នុងខែឧសភា ឆ្នាំ២០២៤ បង្ហាញពីការភាពអត់ធ្មត់របស់ក្រុមតស៊ូ ពោលគឺដណ្ដើមបានូវអ្វីដែលពួកគេចង់បាន ខណៈដែលអ៊ីស្រាអែលមិនអាចទទួលបានអ្វីដែលខ្លួនចង់បាន»។

គួររំលឹកថា អ៊ីស្រាអែល និងក្រុមហេសបូឡា បានព្រមព្រៀងគ្នាឲ្យមានបទឈប់បាញ់ ក្នុងជម្លោះដែលកើតមានឡើងស្របទៅនឹងសង្រ្គាម នៅតំបន់ហ្កាហ្សា ក្នុងខែវិច្ឆិកាឆ្នាំមុន។ បទឈប់បាញ់នោះដែលត្រូវបានសម្របសម្រួលដោយសហរដ្ឋអាមេរិក និងបារាំង តម្រូវឲ្យកងកម្លាំងអ៊ីស្រាអែលដកចេញពីភាគខាងត្បូងប្រទេសលីបង់ ក្នុងរយៈពេល ៦០ថ្ងៃ ហើយតម្រូវឲ្យក្រុមហេសបូឡាដកយុទ្ធជន និងអាវុធទាំងអស់របស់ខ្លួនចេញពីភាគខាងត្បូងនោះដែរ។

ចាប់តាំងពីពេលនោះមក ភាគីទាំង២ បានចោទប្រកាន់គ្នាទៅវិញទៅមកពីបទរំលោភលើបទឈប់បាញ់នេះ។ ហើយលោក Qassem បាននិយាយថា៖ «កុំសាកល្បងជាមួយភាពអត់ធ្មត់របស់យើង ហើយខ្ញុំអំពាវនាវឲ្យរដ្ឋលីបង់ ដោះស្រាយយ៉ាងម៉ឺងម៉ាត់ ចំពោះការរំលោភទាំងនេះដែលមានចំនួនលើសពី ១០០ដង»៕