សៀមរាប ៖ បេក្ខជនប្រមាណ១២២០អង្គ/នាក់ ជាប្រជាពលរដ្ឋខ្មែរក្មេងចាស់ ចាប់ពីអាយុ៦ឆ្នាំ ដល់ជាង ៨០ឆ្នាំ ដែលរស់នៅទាំងក្នុង និងក្រៅប្រទេស ជួបជុំគ្នាចូលរួមប្រកួតសរសេរតាមអានជាសាធារណៈ លើកទី២ នៃសំណេរអង្គរ នៅក្រោមបរិយាកាសដ៏រំភើបសប្បាយរីករាយ នាខាងមុខប្រាសាទអង្គរវត្ត ដែលជាដួងព្រលឹងជាតិខ្មែរ ។

​នៅក្នុងពិធីបើកព្រឹត្តិការណ៍ការសរសេរតាមអានជាសាធារណៈលើកទី២ នៃសំណេរអង្គរ នៅថ្ងៃទី១៩ ខែមករា ឆ្នាំ២០២៥នេះ ឯកឧត្តម លឹម ប៊ុនហុក តំណាងស្ថាបនិកកម្មព្រឹត្តិការណ៍នេះ លើកឡើងថា ការប្រកួតនៅឆ្នាំនេះ គឺមានបេក្ខជនដ៏ច្រើនលើសលុប បានចូលរួមដាក់ពាក្យចូលរួម ហើយសម្រេចបានមុនថ្ងៃកំណត់ ជាមួយនឹងបេក្ខជនមកពីគ្រប់ទិសទី ជាពិសេសទៀតនោះ មានពលរដ្ឋខ្មែរកូនកាត់អាមេរិក និងស្វីស ជិះយន្តហោះមកចូលរួមប្រកួតផងដែរ ព្រោះពួកគេស្រឡាញ់អក្សរសាស្ត្រខ្មែរ ។

 ក្នុងឱកាសនោះ ឯកឧត្តមបណ្ឌិតសភាចារ្យ ហង់ ជូនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ព្រឹត្តិការណ៍នេះ គឺពិតជាបានចូលរួមយ៉ាងច្រើន ក្នុងការអភិរក្សនូវអរិយធម៌ វប្បធម៌អក្សរសាស្ត្រខ្មែរ ហើយបានបំផុសនូវស្មារតីស្នេហាជាតិ ហើយក៏ស្របទៅនឹងកម្មវិធីសិក្សា របស់ក្រសួងអប់រំ ក្នុងការលើកកម្ពស់ការអាន ការសរសេរតាមអានផងដែរ ។

អ្នកចូលរួមប្រកួត បានបង្ហាញនូវការសប្បាយរីករាយ ព្រោះបានចូលរួមព្រឹត្តិការណ៍ដ៏អស្ចារ្យនេះ ខណៈពួកគាត់ក៏បានខិតខំសរសេរតាមអានឲ្យចប់ មិនបោះបង់ការប្រកួត បើទោះបីជាជួបនូវពាក្យពិបាកៗ ។

ឯកឧត្តមឧបនាយករដ្ឋមន្ត្រី ហ៊ុន ម៉ានី ក្នុងនាមជាប្រធានក្រុមប្រឹក្សាភិបាលនៃមូលនិធិម៉ានី បានបង្ហាញនូវក្ដីរំភើប នៅពេលមកទស្សនាព្រឹត្តិការណ៍នេះដោយផ្ទាល់ ព្រោះជាកម្មវិធីមួយ បានលើកតម្លៃនៃអក្សរសាស្ត្រខ្មែរ ហើយឯកឧត្តមក៏បានគាំទ្រឲ្យមានការរៀបចំព្រឹត្តិការណ៍នេះ ទៅទិវាជាតិមួយផងដែរ ។

កម្មវិធីសំណេរអង្គរលើកទី២ នឹងជ្រើសរើសម្ចាស់ជ័យលាភីចំនួន ៦នាក់ ដែល៣នាក់ជាម្ចាស់ជ័យលាភីអាយុចាប់ ១៩ឆ្នាំឡើង និង៣នាក់ទៀត សម្រាប់ជ័យលាភីអាយុចាប់ពី១៨ឆ្នាំចុះក្រោម ព្រមទាំងមានគណៈកម្មការចូលរួមកែវិញ្ញាសាចំនួន ៦០នាក់ ។ការប្រកួតសរសេរតាមអានជាសាធារណៈសំណេរអង្គរ លើកទី១ បានប្រព្រឹត្តឡើង កាលពីថ្ងៃទី២១ ខែមករា ឆ្នាំ២០២៤ ដោយមានបេក្ខជនចូលរួមប្រមាណ ៧០០នាក់ ៕ 

អត្ថបទ បាន សុខរិទ្ធិ