រថយន្តដឹកជំនួយមនុស្សធម៌ជាង ៥៥០ គ្រឿងបានចូលក្នុងតំបន់ ហ្កាហ្សាស្ទ្រីប ឆ្លងកាត់កាត់ព្រំដែនរ៉ាហ្វា(Rafah) កាលពីថ្ងៃអាទិត្យ ជាថ្ងៃដំបូងនៃការអនុវត្តកិច្ចព្រមព្រៀងបទឈប់បាញ់។

ប្រភពមួយនៅក្នុងក្រសួងមហាផ្ទៃហ្កាហ្សាបានប្រាប់សារព័ត៌មាន Anadolu ថា ចាប់តាំងពីព្រឹកថ្ងៃអាទិត្យមក រថយន្តដឹកជំនួយមនុស្សធម៌ចំនួន ៥៥២ គ្រឿងបានចូលតាមច្រកឆ្លងកាត់តំបន់ស្ទ្រីប រួមទាំង ២៤២គ្រឿង ឆ្លងកាត់តាមច្រកខាងជើងតំបន់ស្ទ្រីបនេះ។

ប្រភពបានពន្យល់ថា ការដឹកជញ្ជូនរួមមានប្រេងឥន្ធនៈ សម្ភារពេទ្យ និងគ្រឿងឧបភោគបរិភោគ ព្រមទាំងបន្លែ និងផ្លែឈើ។

លោកក៏បានបញ្ជាក់ផងដែរថា កិច្ចខិតខំប្រឹងប្រែងកំពុងដំណើរការ ដើម្បីជួយសម្រួលដល់ការចូលនៃជំនួយមនុស្សធម៌បន្ថែមទៀត ដើម្បីបំពេញតម្រូវការរបស់ប្រជាជននៅតំបន់ហ្កាហ្សា។

ដោយឡែក សារព័ត៌មាន Al-Qahera News Channel បានរាយការណ៍ថា រថយន្តជំនួយចំនួន ៣៣០ គ្រឿង រួមទាំងរថយន្តដឹកប្រេងចំនួន ២០ គ្រឿង បានចូលក្នុងតំបន់ហ្កាហ្សាស្ទ្រីប តាមច្រកឆ្លងកាត់ដែលគ្រប់គ្រងដោយអ៊ីស្រាអែល Al-Auja និង Kerem Shalom ភាគខាងត្បូង។

កិច្ចព្រមព្រៀងបទឈប់បាញ់នៅតំបន់ហ្កាហ្សាបានចូលជាធរមាននៅម៉ោង ១១និង១៥នាទី ថ្ងៃត្រង់ម៉ោងក្នុងស្រុក កាលពីថ្ងៃអាទិត្យ បន្ទាប់ពីការពន្យារពេលពីរបីម៉ោងដោយសារតែការចោទប្រកាន់របស់អ៊ីស្រាអែលលើក្រុមហាម៉ាស ព្រោះការពន្យារពេលការចេញបញ្ជីឈ្មោះ ក្រុមចំណាប់ខ្មាំងដែល ត្រូវដោះលែង។ ដើមឡើយគ្រោងនឹងចាប់ផ្តើមនៅម៉ោង ៨ និង ៣០ នាទីព្រឹក ម៉ោងក្នុងស្រុក៕