អង្គការសហប្រជាជាតិ បាននិយាយថា មានការងារជាច្រើនដែលត្រូវធ្វើដើម្បីជួយតំបន់ហ្កាហ្សា និងប្រជាជនរបស់តំបន់នេះ ស្តារឡើងវិញពីសង្គ្រាមរយៈពេល១៥ខែ ក្នុងពេលចាប់ផ្តើមបទឈប់បាញ់កាលពីថ្ងៃអាទិត្យ ទី១៩ ខែមករា ខណៈត្រូវបានព្រមព្រៀងគ្នារវាងក្រុមហាម៉ាស និងអ៊ីស្រាអែល។

វីដេអូដែលបានចេញផ្សាយដោយការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បង្ហាញពីសង្កាត់ជាច្រើនដែលត្រូវបានបំផ្លាញ គំនរសំរាម និងមនុស្សជាច្រើនរស់នៅក្នុងចំណោមកម្ទេចកម្ទី។

លោក Gloria Lazic មន្ត្រីមកពីអង្គការ OCHA បាននិយាយថា «ផ្លូវនានានឹងត្រូវការបោសសម្អាត ទីជម្រកចាំបាច់ត្រូវរៀបចំ ហើយការផ្គត់ផ្គង់ត្រូវតែដឹកជញ្ជូនចូល» ។ ប៉ាឡេស្ទីន និងទីភ្នាក់ងារជំនួយ ត្រូវរៀបចំសម្រាប់មនុស្សរាប់ពាន់នាក់ដែលភៀសខ្លួនពីភាគខាងត្បូងតំបន់ហ្កាហ្សា ឲ្យត្រឡប់ទៅកាន់លំនៅឋាននៅភាគខាងជើងវិញ។ កិច្ចព្រមព្រៀងបទឈប់បាញ់ បានចូលជាធរមានក្រោយការពន្យារពេលជិតបីម៉ោង ដោយបានផ្អាកសង្គ្រាមដែលបាននាំមកនូវការផ្លាស់ប្តូរនយោបាយដល់តំបន់មជ្ឈិមបូព៌ា និងផ្តល់ក្តីសង្ឃឹមដល់ប្រជាជន២.៣លាននាក់នៅតំបន់ហ្កាហ្សា ដែលភាគច្រើនត្រូវបានភៀសខ្លួនចេញជាច្រើនដង។

រថយន្តដឹកជំនួយដំបូងពីកម្មវិធីស្បៀងអាហារពិភពលោក (WFP) បានចូលទៅដល់តំបន់ហ្កាហ្សាតាមច្រក Kerem Shalom កាលពីថ្ងៃអាទិត្យ ទី១៩ ខែមករា នៅថ្ងៃដំបូងនៃបទឈប់បាញ់។

ជំនួយត្រូវបានរារាំងដោយការប្រយុទ្ធគ្នា ខណៈការបាញ់ផ្លោងរបស់អ៊ីស្រាអែល បានបំផ្លាញផ្លូវថ្នល់ ហើយក៏មានការចូលលួច និងការដួលរលំទាំងស្រុងនៃសន្តិសុខនិងច្បាប់និងសណ្តាប់ធ្នាប់នៅទូទាំងតំបន់ហ្កាហ្សា បន្ទាប់ពីសង្គ្រាមរយៈពេល១៥ខែ។ ប៉ុន្តែនាយកកម្មវិធីស្បៀងអាហារពិភពលោក (WFP) បាននិយាយនៅទីក្រុង Khan Younis តំបន់ហ្កាហ្សាថា លោកត្រូវបានគេធានាដោយការពិតថាការដឹកជញ្ជូនជំនួយកាលពីថ្ងៃអាទិត្យ បានចូលដោយសុវត្ថិភាព «គ្មានការសម្រុកចូលលួច» ។ ប្រជាជនប៉ាឡេស្ទីន បានអបអរការចាប់ផ្តើមបទឈប់បាញ់នៅទីក្រុង Deir al Balah កាលពីថ្ងៃអាទិត្យ ខណៈរថយន្តដឹកជំនួយជាច្រើនគ្រឿងដែលផ្ទុកប្រេង និងការផ្គត់ផ្គង់ជំនួយ បានតម្រៀបជួរនៅច្រកព្រំដែន ប៉ុន្មានម៉ោងមុនពេលបទឈប់បាញ់ចូលជាធរមាន។