ប្រធានាធិបតីកូរ៉េខាងត្បូងដែលត្រូវបានចោទប្រកាន់ទម្លាក់ពីតំណែង លោក Yoon Suk-yeol បច្ចុប្បន្នស្ថិតនៅក្រោមការឃុំខ្លួនសម្រាប់ការប្រកាសច្បាប់អាជ្ញាសឹកមិនបានសម្រេច គ្រោងបដិសេធការសាកសួរដោយក្រុមអ្នកស៊ើបអង្កេត ក្នុងអំឡុងពេលឃុំខ្លួនលោក។ លោក Yoon ត្រូវបានចាប់ខ្លួន ពីបទសង្ស័យដឹកនាំការបះបោរដោយការប្រកាសច្បាប់អាជ្ញាសឹក ក្នុងចំណោមបទចោទប្រកាន់ផ្សេងៗទៀត។

ក្រុមស៊ើបអង្កេតរួមមួយ មានផែនការស៊ើបអង្កេតលើ លោក Yoon ក្នុងអំឡុងពេលឃុំខ្លួនស្របច្បាប់ ដែលននឹងបញ្ចប់នៅដើមខែកុម្ភៈ។ ក្រុមការងារ បានជូនដំណឹងដល់ លោក Yoon ថា លោកនឹងត្រូវបានសាកសួរនៅអគារទីភ្នាក់ងារស៊ើបអង្កេតមួយនៅជាយទីក្រុងសេអ៊ូល កាលពីថ្ងៃអាទិត្យ ជាលើកដំបូងបន្ទាប់ពីការចាប់ខ្លួនលោក។ ប៉ុន្តែ លោក Yoon ដែលស្ថិតនៅក្នុងមន្ទីរឃុំឃាំង បានបដិសេធ។

មេធាវីរបស់ លោក Yoon បាននិយាយថា ពុំមានអ្វីត្រូវនិយាយទៅកាន់មន្ត្រីស៊ើបអង្កេតទៀតទេ។ ក្រុមនេះ គ្រោងនឹងស្នើសុំឱ្យ លោក Yoon បង្ហាញខ្លួនជាថ្មីម្តងទៀតដើម្បីសាកសួរនៅថ្ងៃចន្ទនេះ។ ប៉ុន្តែប្រធានាធិបតីរូបនេះ ត្រូវបានគេជឿថា នឹងបដិសេធមិនឲ្យសាកសួរឡើយ។

ទីភ្នាក់ងារសារព័ត៌មាន Yonhap របស់ប្រទេសកូរ៉េខាងត្បូង រាយការណ៍ថា ក្រុមនេះទំនងជានឹងពិចារណា ដោយទៅពិនិត្យមើលនៅមណ្ឌលឃុំឃាំង ឬត្រូវនាំយកលោកYoon ដោយបង្ខំ ទៅកាន់កន្លែងស៊ើបអង្កេត ប្រសិនបើលោកនៅបន្តបដិសេធនីតិវិធីសាកសួរ។

ក្រុមអ្នកច្បាប់របស់ លោក Yoon តាមសេចក្តីរាយការណ៍ថា កំពុងពិចារណាលើវិធានការប្រឆាំងតបត ដូចជាការដាក់ពាក្យស្នើសុំទៅតុលាការ ដើម្បីពិនិត្យមើលថាតើ ការចាប់ខ្លួនលោក គឺសមស្របឬអត់។