អាជ្ញាធរក្នុងតំបន់ ក្នុងប្រទេសនីហ្សេរីយ៉ា បាននិយាយកាលពីថ្ងៃអាទិត្យថា ពិធីបុណ្យសពដ៏ធំមួយ ត្រូវបានរៀបចំឡើងសម្រាប់ជនរងគ្រោះនៃការផ្ទុះរថយន្តដឹកប្រេងកាលពីថ្ងៃសៅរ៍ ខណៈមានការបញ្ជាក់ថាចំនួនអ្នកស្លាប់ បានកើនឡើងពី៨០នាក់ ដល់៨៦នាក់។

លោក Abdullahi Baba-Arah ប្រធានទីភ្នាក់ងារគ្រប់គ្រងគ្រោះអាសន្នរដ្ឋនីហ្សេ បានប្រាប់អ្នកសារព័ត៌មានកាលពីថ្ងៃអាទិត្យថា សាកសពសរុបចំនួន៨០នាក់ ត្រូវបានកប់នៅក្នុងផ្នូររួមធំមួយនៅក្នុងតំបន់រដ្ឋាភិបាលក្នុងតំបន់ Gurara បន្ទាប់ពីរថយន្តដឹកប្រេង បានផ្ទុះនៅពេលដែលវាបានក្រឡាប់ កំពប់ប្រេងនៅលើផ្លូវដ៏មមាញឹកនៅក្នុងតំបន់ Dikko កាលពីថ្ងៃសៅរ៍។

លោក Baba-Arah និយាយថា សាកសពជនរងគ្រោះដែលអាចកំណត់អត្តសញ្ញាណបានចំនួនប្រាំនាក់ ត្រូវបានសាច់ញាតិរបស់ពួកគេនាំយកទៅបញ្ចុះ។ ការបញ្ចុះសពដ៏ធំនេះ ធ្វើឡើងដោយមានការគាំទ្រពីអាជ្ញាធររដ្ឋាភិបាលក្នុងតំបន់ និងអ្នកស្ម័គ្រចិត្ត។

មន្ត្រីឆ្លើយតបគ្រាអាសន្នបាននិយាយថា មនុស្សយ៉ាងហោចណាស់៥៥នាក់ បច្ចុប្បន្ននេះកំពុងទទួលការព្យាបាលនៅមណ្ឌលសុខភាពក្នុងតំបន់។

សោកនាដកម្ម បានកើតឡើងកាលពីថ្ងៃសៅរ៍ ខណៈដែលអ្នកស្រុកជាច្រើននាក់នៅតំបន់ Dikko នៃរដ្ឋនីហ្សេ ត្រូវភ្លើងឆេះយ៉ាងសន្ធោសន្ធៅ ខណៈកំពុងព្យាយាមប្រមូលយកប្រេងពីរថយន្តដឹកប្រេង ដែលក្រឡាប់។