ប្រជាជននៅក្នុងទីក្រុងប៉េកាំង បាននិយាយនៅថ្ងៃចន្ទ ទី២០ ខែមករានេះថា ពួកគេមានការព្រួយបារម្ភអំពីដំណើរដែលសេដ្ឋកិច្ចរបស់ប្រទេសចិននិង «ប្រជាជនសាមញ្ញ» អាចនឹងរងផលប៉ះពាល់ក្រោយប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ចូលកាន់តំណែង ជាលើកទីពីរ។

ពលរដ្ឋម្នាក់ឈ្មោះ Wang បម្រើការក្នុងវិស័យទេសចរណ៍ បាននិយាយថា ការពិតនោះគឺថា លោក Trump គឺជា «មនុស្សឆ្កួត និងជាមនុស្សឃោឃៅ» ធ្វើឱ្យនាង គិតពីរដងរួចមកហើយ អំពីថាតើសេដ្ឋកិច្ចរបស់ប្រទេសចិននឹងប្រសើរឡើង ឬកាន់តែអាក្រក់ នៅពេលលោកចូលកាន់តំណែង។

អ្នកស្រុកម្នាក់ទៀត បាននិយាយថា នាងមិនចង់ឱ្យសហរដ្ឋអាមេរិកដាក់ទណ្ឌកម្មលើប្រទេសចិនទេ ដោយសារតែប្រទេសនេះនៅកំពុងអភិវឌ្ឍលើវិស័យសំខាន់ៗ រួមទាំងបច្ចេកវិទ្យាផងដែរ ដោយនាងបានបង្ហាញក្តីសង្ឃឹមថា ទំនាក់ទំនងអាចប្រសើរឡើងនៅពេលពេលវេលាបន្តខាងមុខ។

លោក Trump នឹងស្បថចូលកាន់តំណែងនៅថ្ងៃចន្ទនេះ ដោយចូលកាន់តំណែងក្នុងអាណត្តិលើកទីពីររបស់លោក ។

លោក Trump បានសន្យាថានឹងដាក់ពន្ធបន្ថែម ១០% លើមុខទំនិញរបស់ចិន លុះត្រាតែទីក្រុងប៉េកាំង ធ្វើការបន្ថែមទៀតដើម្បីបញ្ឈប់ការជួញដូរសារធាតុញៀនហ្វង់តានីល ហើយលោកបានគំរាមដាក់ពន្ធលើសពី៦០% លើមុខទំនិញចិន កាលពីពេលកំពុងដំណើរការយុទ្ធនាការ។

លោក Trump បាននិយាយកាលពីថ្ងៃទី៦ ខែមករាថា លោក និងលោក Xi បាននិងកំពុងទាក់ទងគ្នាតាមរយៈអ្នកតំណាង ដោយបង្ហាញពីសុទិដ្ឋិនិយម អំពីទំនាក់ទំនងរបស់មេដឹកនាំទាំងពីរ។