ប្រព័ន្ធផ្សព្វផ្សាយហ៊ួទី បានរាយការណ៍ថា កងកម្លាំងសហរដ្ឋអាមេរិក បានធ្វើការវាយប្រហារតាមផ្លូវអាកាសថ្មី ទៅលើតំបន់របស់ប្រទេសយេម៉ែន នៅភាគខាងជើងទីក្រុង Sanaa កាលពីព្រឹកថ្ងៃអាទិត្យ បន្ទាប់ពីមានការអះអាងពីក្រុមហ៊ួទីថា បានកំណត់គោលដៅលើនាវាផ្ទុកយន្តហោះ និងនាវាចម្បាំងរបស់សហរដ្ឋអាមេរិក នៅក្នុងសមុទ្រក្រហម។

ទូរទស្សន៍Al-Masirah ដែលគ្រប់គ្រងដោយក្រុមហ៊ួទី បានអះអាងថា សហរដ្ឋអាមេរិក បានធ្វើការវាយប្រហារតាមអាកាសចំនួន ៤លើកទៅលើតំបន់ Al-Azraqeen ភាគខាងជើងនៃរដ្ឋធានី Sanaa ។ អ្នកស្រុក បានបញ្ជាក់ប្រាប់សារព័ត៌មានស៊ីនហួថា ការផ្ទុះត្រូវបានគេឮពាសពេញទីក្រុងនេះ បន្ទាប់ពីការវាយ ប្រហារ ។

ការវាយប្រហារនេះ បានកើតឡើងប៉ុន្មានម៉ោង បន្ទាប់ពីអ្នកនាំពាក្យយោធាក្រុមហ៊ួទី លោក Yahya Sarea បានប្រកាសថា៖«ប្រតិបត្តិការយោធាយេម៉ែនរួមគ្នា» ផ្តោតលើនាវាផ្ទុកយន្តហោះ USS Harry Truman និងនាវាអមដំណើរ នៅភាគខាងជើងនៃសមុទ្រក្រហម ដោយប្រើ «យានដ្រូននិងមីស៊ីលតម្រង់គោលដៅ ។

លោក Sarea បាននិយាយថា ប្រតិបត្តិការនេះ «សម្រេចបាននូវគោលដៅរបស់ខ្លួនដោយជោគជ័យ» និងជាការវាយប្រហារលើកទី៨ ទៅលើនាវាផ្ទុកយន្តហោះ ចាប់តាំងពីការដាក់ពង្រាយរបស់ខ្លួន ទៅកាន់តំបន់សមុទ្រក្រហម។

ទីបញ្ជាការកណ្តាលរបស់សហរដ្ឋអាមេរិក បានប្រកាសពីការមកដល់របស់ក្រុមនាវាផ្ទុកយន្តហោះ នៅក្នុងសមុទ្រក្រហម កាលពីថ្ងៃទី ១៤ ខែធ្នូ។