ភ្នំពេញ៖ មានប្រសាសន៍ក្នុងពិធីសម្ពោធដាក់ឱ្យប្រើប្រាស់អគារទីស្តីការក្រសួងរៀបចំដែនដី នគរូបនីយកម្ម និងសំណង់ នៅព្រឹកថ្ងៃទី៨ ខែវិច្ឆិកានេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បាន រម្លឹកពីស្នាព្រះហស្តទាមទារយកឯករាជ្យភាពសម្រាប់កម្ពុជារបស់ព្រះករុណាព្រះបាទសម្ដេចព្រះ នរោត្ដម សីហនុ ព្រះបរមរតនកោដ្ឋ ដែលការទាមទារយកនូវឯករាជ្យភាពរបស់ព្រះអង្គ គឺមិនបានធ្វើឱ្យកម្ពុជាមានការបែងចែកទឹកដីដូចប្រទេសក្បែរខាងកម្ពុជានោះទេ។
ព្រះករុណាព្រះបាទសម្ដេចព្រះ នរោត្ដម សីហនុ ព្រះអង្គបានប្រកាសឯករាជ្យភាពសម្រាប់កម្ពុជាម្ដងកាលពីខែមីនា ឆ្នាំ១៩៤៥ នៅអំឡុងពេលដែលជប៉ុនចូលមកកម្ពុជា។ ឯករាជ្យភាពនេះត្រូវបាត់រូបរាងទៅវិញនៅក្នុងឆ្នាំដដែល នៅបន្ទាប់ពីបារាំងវិលមកកាន់កម្ពុជាសាជាថ្មី។ យ៉ាងនេះក្ដីក៏ព្រះករុណាព្រះ បាទសម្ដេចព្រះ នរោត្ដម សីហនុ នៅតែបន្តតស៊ូទាមទារយកឯករាជ្យភាពសម្រាប់កម្ពុជាជាបន្តបន្ទាប់ជាដដែល តាមរយៈព្រះរាជសកម្មភាពព្រះអង្គយាងចេញទៅសុំកិច្ចអន្តរាគមន៍ពីសហគមន៍អន្តរជាតិ រហូតសម្រេចបានជោគជ័យជាស្ថាពរ នៅថ្ងៃទី៩ ខែវិច្ឆិកា ឆ្នាំ១៩៥៣ ដែលបារាំងបានព្រមព្រៀងប្រ គល់នូវឯករាជ្យភាពពេញបរិបូរជូនកម្ពុជា។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ក៏បានស្នើដល់ប្រទេសនានាឱ្យគោរពចំ ពោះឯករាជ្យភាព និងអធិបតេយ្យភាពរបស់កម្ពុជាផងដែរ៕ ដោយ៖ គង់ ឌិន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
