ទីភ្នាក់ងារការពារបរិស្ថានជាតិ បាននិយាយកាលពីថ្ងៃអាទិត្យថា ការលុកលុយរបស់សហរដ្ឋអាមេរិកលើ  អាហ្វហ្គានីស្ថាន និងការដាក់ទណ្ឌកម្មជាបន្តបន្ទាប់ បានធ្វើឲ្យមានការផលប៉ះពាល់ពីការប្រែប្រួលអាកាសធាតុ នៅក្នុងប្រទេសនេះ កាន់តែធ្ងន់ធ្ងរ ខណៈដែលទីក្រុងកាប៊ុល បានអំពាវនាវដល់សហគមន៍អន្តរជាតិឲ្យគាំទ្រក្នុងការប្រយុទ្ធប្រឆាំងនឹងវិបត្តិបរិស្ថាន។

ក្នុងអំឡុងការលុកលុយដែលដឹកនាំដោយសហរដ្ឋអាមេរិកឆ្នាំ ២០០១ និងការដកកងទ័ពដ៏ចម្រោងចម្រាស ក្នុងឆ្នាំ ២០២១ យោធាអាមេរិក បានទម្លាក់គ្រាប់បែករាប់ម៉ឺនគ្រាប់លើប្រទេសអាហ្វហ្គានីស្ថាន ដែលគ្រាប់បែកភាគច្រើនដែលអាចធ្វើឲ្យជាតិពុលប៉ះពាល់ដល់បរិស្ថាន។

លោកបណ្ឌិត Zainul Abedin Abed អគ្គនាយករងបច្ចេកទេស និងគោលនយោបាយ នៅទីភ្នាក់ងារ គោលនយោបាយបរិស្ថានជាតិ (NEPA) បានប្រាប់សារព័ត៌មាន Arab News ថា៖«វត្តមានរបស់កងកម្លាំងអាមេរិក និងអង្គការណាតូ នៅក្នុងប្រទេសអាហ្វហ្គានីស្ថានអស់រយៈពេល ២០ឆ្នាំ បានជះឥទ្ធិពលយ៉ាងទូលំទូលាយ ទៅលើប្រទេសនេះ»។

«ក្នុងចំណោមផលប៉ះពាល់បរិស្ថាន យើងអាចលើកឡើងអំពីករណីដូចជាការបំផ្លិចបំផ្លាញដីកសិកម្ម... ផលប៉ះពាល់ទាំងនេះ បានដាក់សម្ពាធលើបរិស្ថានអាហ្វហ្គានីស្ថាន និងការពន្លឿនការប្រែប្រួលអាកាស  ធាតុ។ សហរដ្ឋអាមេរិក និងអង្គការណាតូ បានប្រើអាវុធ និងសារធាតុគីមី ដែលមិនអាចជួសជុលបាន ឡើយ»។