នាយករដ្ឋមន្រ្តីអង់គ្លេស លោក Keir Starmer កំពុងរៀបចំត្រៀមខ្លួន សម្រាប់រឿងរ៉ាវកើតឡើងជាយថាហេតុទាំងអស់ នៅពេលដែលមានការផ្លាស់ប្ដូរតំណែងប្រធានាធិបតីអាមេរិក នៅថ្ងៃចន្ទ (ទី២០ ខែមករា) ដោយរដ្ឋបាលបន្ទាប់របស់លោក Donald Trump កំពុងគំរាមកំហែងដំឡើងពន្ធលើពាណិជ្ជកម្មជាមួយប្រទេសផ្សេងៗ នៅលើពិភពលោក។

គួរបញ្ជាក់ថា លោក Trump បានប្តេជ្ញាម្តងហើយម្តងទៀតថា នឹងដំឡើងពន្ធរហូតដល់ ២០ភាគរយលើការនាំចូលទៅកាន់សហរដ្ឋអាមេរិក ដោយអត្រាពន្ធខ្ពស់ជាងគេលើទំនិញរបស់ចិន ជាលទ្ធភាពនៃចំណាត់ការ ដែលរដ្ឋមន្ត្រីពាណិជ្ជកម្ម និងពាណិជ្ជកម្មចក្រភពអង់គ្លេស លោក Jonathan Reynolds កាលពីសប្តាហ៍មុន បាននិយាយថា ធ្វើឲ្យលោកមានក្ដីបារម្ភ ដោយសារតែ «ផលប៉ះពាល់ និងហានិភ័យ សម្រាប់ចក្រភពអង់គ្លេស គឺពិតជាធ្ងន់ធ្ងរខ្លាំង បើប្រៀបធៀបនឹងប្រទេសខ្លះ»។

ប៉ុន្តែកាលពីថ្ងៃអាទិត្យ (ទី១៩ ខែមករា) សហសេវិកគណៈរដ្ឋមន្ត្រីម្នាក់ បានបង្ហាញពីភាពមិនសូវខ្វល់ខ្វាយខ្លាំង។ ក្នុងបទសម្ភាសន៍ជាមួយទូរទស្សន៍ BBC មន្ត្រីជាន់ខ្ពស់ក្រសួងរតនាគារ លោក Darren Jones ដែលជាអនុប្រធានរបស់រដ្ឋមន្ត្រីរនតនាគារ លោកស្រី Rachel Reeves បានប្រាប់ថា៖ រដ្ឋាភិបាលបានរៀបចំត្រៀមទប់ទល់ សម្រាប់គ្រប់សេណារីយ៉ូទាំងអស់។ យើងត្រូវចាំមើលពីអ្វីដែលរដ្ឋបាលលោក Trump នឹងធ្វើ»។

ការវិលទៅកាន់អំណាចវិញរបស់លោក Trump គឺជាពេលវេលាដ៏មានហានិភ័យមួយ សម្រាប់រដ្ឋបាលនៃគណបក្សការងាររបស់លោក Starmer ដោយសារតែគណបក្សរបស់លោក មានទំនាក់ទំនងយ៉ាងជិតស្និទ្ធជាមួយនឹងគណបក្សប្រជាធិបតេយ្យដែលកំពុងជិតផុតអាណត្តិ ហើយសមាជិកជាច្រើននៃគណៈរដ្ឋមន្ត្រីរបស់លោក បានរិះគន់ប្រធានាធិបតីជាប់ឆ្នោត នាពេលកន្លងមក។

ជាងនេះទៅទៀត ដោយភាពនៅទ្រឹងនៃសេដ្ឋកិច្ចរបស់ចក្រភពអង់គ្លេស ជម្លោះពាណិជ្ជកម្មណាមួយដែលបង្កឡើងដោយរដ្ឋបាលថ្មីរបស់សហរដ្ឋអាមេរិក ទំនងជានឹងធ្វើឲ្យមានហានិភ័យដល់អ្វីដែលនាយករដ្ឋមន្ត្រី បានពិពណ៌នាថា ជាបេសកកម្មស្នូលរបស់លោក នៅក្នុងរដ្ឋាភិបាល ដើម្បីជំរុញដល់កំណើនសេដ្ឋកិច្ច៕