អតីតឧបនាយករដ្ឋមន្ត្រីកាណាដា លោកស្រី Chrystia Freeland បានចាប់ផ្តើមយុទ្ធនាការរបស់លោកស្រី កាលពីថ្ងៃអាទិត្យ (ទី១៩ ខែមករា) ដើម្បីជំនួសតំណែងលោក Justin Trudeau ជាមេដឹកនាំ និងជានាយករដ្ឋមន្ត្រីនៃគណបក្សសេរីនិយម ដោយចាត់ទុកខ្លួនលោកស្រីថា ជាជម្រើសដ៏ល្អបំផុត ដើម្បីតទល់នឹងប្រធានាធិបតីបន្ទាប់របស់អាមេរិក គឺលោក Donald Trump។

គួរដឹងថា លោកស្រី Freeland គឺជាសម្ព័ន្ធមិត្តដ៏ជិតស្និទ្ធបំផុតមួយរូបរបស់លោក Trudeau នៅក្នុងរដ្ឋាភិបាល គិតចាប់តាំងពីក្រុមសេរីនិយម បានឡើងកាន់តំណែង នៅក្នុងឆ្នាំ២០១៥ ហើយក៏បានបម្រើការរយៈពេល ៤ឆ្នាំ ជារដ្ឋមន្ត្រីហិរញ្ញវត្ថុ រហូតដល់មានការលាលែងពីតំណែដ៏គួរឲ្យភ្ញាក់ផ្អើល កាលពីខែធ្នូឆ្នាំមុន។

នៅក្នុងលិខិតលាលែងពីតំណែងដែលមានសាររិះគន់ខ្លាំងៗ លោកស្រីបានចោទប្រកាន់លោក Trudeau ថា បានយកផលប្រយោជន៍នយោបាយផ្ទាល់ខ្លួនរបស់លោក ជាជាងការមានតម្រូវការបន្ទាន់ ដើម្បីរៀបចំប្រទេសកាណាដាត្រៀមទប់ទល់នឹងការគំរាមកំហែងនាពេលខាងមុខរបស់រដ្ឋបាលលោក Trump ក្នុងនោះរួមទាំងសង្គ្រាមពាណិជ្ជកម្មដែលអាចកើតមានផងដែរ។

ការចាកចេញរបស់លោកស្រី Freeland ត្រូវបានគេមើលឃើញថា ជាផលប៉ះពាល់ដ៏អាក្រក់ដែលជំរុញឲ្យលោក Trudeau ប្រកាសពីផែនការរបស់លោក ក្នុងការចាកចេញពីតំណែង។ លោក Trudeau បាននិយាយថា លោកនឹងបន្តធ្វើជានាយករដ្ឋមន្ត្រីចាំផ្ទះ រហូតដល់គណបក្សសេរីនិយមជ្រើសរើសបានមេដឹកនាំថ្មី ដែលត្រូវបានរំពឹងទុកថា នឹងកើតមាននៅថ្ងៃទី៩ ខែមីនា។

ក្នុងការចូលរួមប្រជែងតំណែងនេះ លោកស្រី Freeland ភ្លាមៗបានក្លាយជាបេក្ខជនឈានមុខ ដែលអាចនឹងជំនួសតំណែងលោក Trudeau រួមជាមួយនឹងលោក Mark Carney ដែលធ្លាប់គ្រប់គ្រងធនាគារកាណាដា និងធនាគារអង់គ្លេស៕