ធនាគារកណ្តាលរបស់ប្រទេសកូរ៉េខាងត្បូង នៅថ្ងៃចន្ទ (២០ មករា) នេះ បានឲ្យដឹងថា ខ្លួនបានកាត់បន្ថយការព្យាករណ៍កំណើនសេដ្ឋកិច្ចឆ្នាំ២០២៥ របស់ខ្លួន ដោយសារតែវិបត្តិនយោបាយដែលបង្កឡើងដោយការប្រកាសច្បាប់អាជ្ញាសឹករបស់ប្រធានាធិបតី លោក Yoon Suk Yeol កាលពីខែមុន។

គួររំលឹកថា លោក Yoon បានផ្អាកការគ្រប់គ្រងស៊ីវិលរយៈពេលខ្លី កាលពីថ្ងៃទី៣ ខែធ្នូ ដោយបញ្ជូនទាហានទៅកាន់រដ្ឋសភា ប៉ុន្តែសមាជិកសភា បានបោះឆ្នោតច្រានចោលវិធានការនេះ ហើយក្រោយមកបានចោទប្រកាន់ទម្លាក់តំណែងប្រធានាធិបតី ដែលឥឡូវនេះកំពុងត្រូវបានឃុំខ្លួន សម្រាប់ការស៊ើបអង្កេតបទល្មើសព្រហ្មទណ្ឌ ជុំវិញការចោទប្រកាន់ពីបទបះបោរ។

ធនាគារកណ្តាលកូរ៉េ បានឲ្យដឹងនៅក្នុងសេចក្តីថ្លែងការណ៍ថា៖ «ការប្រកាសច្បាប់អាជ្ញាសឹកដែលមិននឹកស្មានដល់នៅដើមខែធ្នូឆ្នាំមុន រួមជាមួយនឹងភាពចលាចលនយោបាយដែលកំពុងបន្តមាន និងគ្រោះមហន្តរាយនៃយន្តហោះដឹកអ្នកដំណើររបស់ក្រុមហ៊ុនអាកាសចរណ៍ Jeju Air បានធ្វើឲ្យប៉ះពាល់ដល់សេដ្ឋកិច្ចយ៉ាងខ្លាំង»។

ធនាគារបានបន្ថែមថា ភាពចលាចលនយោបាយ និងគ្រោះមហន្តរាយយន្តហោះ «បាននាំឲ្យមានការធ្លាក់ចុះនៃការប្រើប្រាស់ក្នុងស្រុក និងការវិនិយោគផ្នែកសំណង់ ដែលទំនងជាធ្វើឲ្យអត្រាកំណើនសេដ្ឋកិច្ច នៅត្រីមាសទី៤ ធ្លាក់ចុះក្រោមការព្យាករណ៍ខែវិច្ឆិកា»។

ធនាគារបានព្យាករថា នឹងមានកំណើន ១,៩ភាគរយ សម្រាប់ឆ្នាំ២០២៥ ប៉ុន្តែ «ការព្យាករណ៍ត្រូវបានកែសម្រួលមកត្រឹម ១,៦ ទៅ ១,៧ភាគរយវិញ»៕