សម្តេច ប៉ាប ហ្វ្រង់ស៊ីស កាលពីថ្ងៃអាទិត្យ (ទី១៩ ខែមករា) បានរិះគន់ផែនការរបស់ប្រធានាធិបតីជាប់ឆ្នោតអាមេរិក លោក Donald Trump ដែលត្រូវបានរាយការណ៍ថា នឹងចាត់វិធានការអនុវត្តច្បាប់អន្តោប្រវេសន៍យ៉ាងខ្លាំងក្លាភ្លាមៗ នៅទូទាំងសហរដ្ឋអាមេរិក ក្នុងរយៈពេលប៉ុន្មានថ្ងៃបន្ទាប់ពីលោកចូលកាន់តំណែង។

នៅក្នុងបទសម្ភាសន៍ជាមួយទូរទស្សន៍អ៊ីតាលី សម្តេចសង្ឃកាតូលិក បានមានព្រះបន្ទូលថា វានឹងក្លាយជារឿង «ដ៏អាម៉ាស់» ប្រសិនបើលោក Trump បន្តផែនការនេះ ជាការប្រើភាសាធ្ងន់មិនធម្មតា សម្រាប់មេដឹកនាំសាសនាគ្រិស្តសកល។

សម្តេច ប៉ាប បានមានបន្ទូលថា៖ «វានឹងធ្វើឲ្យជនអន្តោប្រវេសន៍ដែលមិនមានអ្វីទាំងអស់ រងទុក្ខយ៉ាងធ្ងន់ធ្ងរ។ វាមិនដំណើរការទេ។ អ្នកមិនអាចដោះស្រាយបញ្ហាតាមរបៀបនេះទេ»។

សម្តេច ប៉ាប បានបង្ហាញពីការយកព្រះហឫទ័យទុកដាក់ដល់ជនអន្តោប្រវេសន៍ ក្នុងរយៈពេលជិត ១២ឆ្នាំនៃការបំពេញតួនាទីជាសម្ដេចសង្ឃកាតូលិក ហើយព្រះអង្គធ្លាប់បានរិះគន់វោហារសាស្ត្រប្រឆាំងជនអន្តោប្រវេសន៍របស់លោក Trump កាលពីមុន។ អំឡុងការបោះឆ្នោតប្រធានាធិបតីអាមេរិកឆ្នាំ២០១៦ ព្រះអង្គបានមានបន្ទូលថា លោក Trump «មិនមែនជាអ្នកកាន់សាសនាគ្រិស្តនោះឡើយ» តាមទស្សនៈរបស់ព្រះអង្គ។

មន្ត្រីរដ្ឋបាលបន្ទាប់របស់លោក Trump បាននិយាយកាលពីថ្ងៃទី១៨ ខែមករាថា ប្រធានាធិបតីជាប់ឆ្នោតកំពុងពិចារណាឡើងវិញនូវផែនការ សម្រាប់ការឆ្មក់ចូលចាប់ជនអន្តោប្រវេសន៍ នៅទីក្រុង Chicago នាសប្តាហ៍ក្រោយ បន្ទាប់ពីមានរបាយការណ៍អំពីផែនការនិរទេសដ៏ធំ ក្រោយចូលកាន់តំណែង៕