នៅព្រឹកថ្ងៃចន្ទនេះ ជនប៉ាឡេស្ទីនជម្លៀសខ្លួនត្រូវបានគេមើលឃើញដើរឆ្លងកាត់ផ្លូវពោរពេញដោយគំនរបាក់បែកនៅជំរំ Jabalia ស្ថិតនៅភាគខាងជើងតំបន់ហ្កាហ្សា រយៈពេល ១ថ្ងៃក្រោយបទឈប់បាញ់ចាប់ផ្តើម ។

ជំរំ Jabalia ដែលស្ថិតក្នុងចំណោមជំរំទាំង ៨ ធំជាងគេបំផុតនៅតំបន់ហ្កាហ្សានោះ ធ្លាប់មើលឃើញតំបន់ជុំវិញខ្លួនគ្មានមនុស្សម្នានោះទេ ហើយនិងរងការវាយឆ្មក់ជាប្រព័ន្ធដោយកងកម្លាំងអ៊ីស្រាអែល នៅក្នុងប្រតិបត្តិការសឹកសំខាន់របស់ពួកគេ ដែលបានចាប់ផ្តើមឡើងកាលពីថ្ងៃទី ៥ ខែតុលា ឆ្នាំ ២០២៤ ។

កិច្ចព្រមព្រៀងបទឈប់បាញ់បានចូលជាធរមានកាលពីវេលាម៉ោង ១១ និង ១៥នាទីព្រឹក ម៉ោងក្នុងស្រុកថ្ងៃអាទិត្យ ក្រោយពន្យាពេលអស់រយៈពេលជិត ៣ម៉ោង ជាការផ្អាកសង្រ្គាមដែលនាំឲ្យមានការផ្លាស់ប្តូរនយោបាយរញ្ជួយធរណីនៅតំបន់មជ្ឈិមបូព៌ា ក៏ដូចជាផ្តល់ក្តីសង្ឃឹមថ្មីដល់ពលរដ្ឋ ២,៣លាននាក់នៅតំបន់ហ្កាហ្សា ដែលភាគច្រើននៃពួកគេ បានជម្លៀសខ្លួនញឹកញាប់ជាច្រើនលើកច្រើនសារ ។

សង្រ្គាមហ្កាហ្សា បានចាប់ផ្តើមឡើង ក្រោយក្រុមហាម៉ាស់ ដែលគ្រប់គ្រងដែនដីបិទច្រកមួយនេះ វាយប្រហារលើអ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣ ដោយបានសម្លាប់មនុស្ស ១.២០០នាក់ និងចាប់ចំណាប់ថ្នូរ ២៥១នាក់ ៕