រូបថតសន្លឹកថតបានពេលដែលអ្នកទោសប៉ាឡេស្ទីនត្រូវបានដោះលែងពីពន្ធនាគារអ៊ីស្រាអែល ទទួលបានការស្វាគមន៍ពីមនុស្សជាទីស្រលាញ់របស់ពួកគេ និងហ្វូងមនុស្សរីករាយនាព្រឹកថ្ងៃចន្ទនេះ ។

ក្រុមហាម៉ាស់ បានដោះលែងចំណាប់ថ្នូរអ៊ីស្រាអែល ៣នាក់ ហើយអ៊ីស្រាអែល បានដោះលែងអ្នកទោសប៉ាឡេស្ទីន ៩០នាក់ កាលពីថ្ងៃអាទិត្យ នៅថ្ងៃដំបូងនៃបទឈប់បាញ់ ដើម្បីផ្អាកសង្រ្គាមរយៈពេល ១៥ ខែ ដែលបានបំផ្លិចបំផ្លាញតំបន់ហ្កាហ្សាស្រ្ទីប និងបង្កភាពវឹកវរនៅតំបន់មជ្ឈិមបូព៌ា ។

យោងតាមការអះអាងរបស់ក្រុមហាម៉ាស់ បានឲ្យដឹងថា អ្នកទោសដែលត្រូវបានដោះលែងពីពន្ធនាគារអ៊ីស្រាអែល រួមមានស្រ្តី ៦៩នាក់ និងក្មេងប្រុស ២១នាក់ មកពីតំបន់វ៉េសប៊ែង និងទីក្រុងហ្សេរុយសាឡឹម ។

សូមបញ្ជាក់ថា មាននូវការបំផ្លិចបំផ្លាញទ្រង់ទ្រាយធំនៅតំបន់ហ្កាហ្សា ជាពិសេសការខូចខាតប្រព័ន្ធផ្គត់ផ្គង់ទឹកស្អាត និងអនាម័យ ។ 

មុនពេលសង្រ្គាមផ្ទុះឡើង មានផលិតកម្មទឹក ៨០ភាគរយ បានមកពីអណ្តូងទឹកក្រោមដី ប៉ុន្តែឡូវនេះ ភ្នាក់ងារជំនួយ បានប៉ាន់ស្មានថា មានត្រឹមតែ ៨ភាគរយប៉ុណ្ណោះនៃអណ្តូងទាំងនោះនៅភាគខាងជើងហ្កាហ្សា អាចប្រើប្រាស់បាន ធ្វើឲ្យទុក្ខវេទនាកាន់តែកើតមានខ្លាំងដល់អ្នកពលរដ្ឋ ៕