​អាមេរិក៖ ករណី​ឆ្លង​វីរុស​កូ​រ៉ូ​ណា​បាន​នឹង​កំពុង​ហក់​ឡើងវិញ​នៅ​ទូទាំង​អឺរ៉ុប រួម​ទាំង​កន្លែង​ខ្លះ​ដែល​គេ​គិត​ថា​អាច​គ្រប់គ្រង​បាន​ល្អ​។ មន្ត្រី​ជាន់ខ្ពស់​ផ្នែក​សុខភាព​ពិភពលោក​ម្នាក់​បាន​ប្រាប់​ទូរទស្សន៍ CBS News ថា​ ទំនោរ​បង្ហាញ​ថា​ជោគជ័យ​ថ្ងៃនេះ មិន​មានន័យថា​ជោគជ័យ​នៅ​ថ្ងៃស្អែក​នោះ​ទេ ហើយ​សហរដ្ឋអាមេរិក​គួរតែ​យកចិត្តទុកដាក់​ឲ្យ​មែនទែន​។​

​ទ្វីប​អឺរ៉ុប​បាន​មើល​ឃើញ​ការ​កើន​ឡើង​ជាង ៥០% នៃ​ករណី​ឆ្លង​ថ្មី​ក្នុង​រយៈពេល​ ១ខែ​ចុងក្រោយ​នេះ ហើយ​អង្គការ​សុខភាព​ពិភពលោក​បាន​ព្រមាន​ថា ​ទ្វីប​នេះ​អាច​នឹង​មាន​អ្នក​ស្លាប់​កន្លះ​លាន​នាក់​ទៀត​នៅ​ខែ​កុម្ភៈ​។ ​អ្នកឆ្លើយឆ្លង​ព័ត៌មាន​បរទេស​ជាន់ខ្ពស់​របស់​ទូរទស្សន៍ CBS News លោក Charlie D'Agata បាន​និយាយ​ថា មន្ត្រី​ជាន់​ខ្ពស់​រូប​នេះ​បាន​បង្ហាញ​ពី​ក្ដី​បារម្ភ និង​បាន​ប្រាប់​លោក​ថា​មាន "​ក្តី​បារម្ភ​យ៉ាង​ធ្ងន់ធ្ងរ​" ខណៈ​ដែល​អឺរ៉ុប​កំពុង​ស្ថិត​នៅ​ក្រោម​ការ​គ្របដណ្ដប់​ជា​ថ្មី​ទៀត​ដោយសារ​វីរុស COVID-19។​ លោក​វេជ្ជបណ្ឌិត Hans Kluge នាយក​ប្រចាំ​តំបន់​របស់​អង្គការ​សុខភាព​ពិភពលោក​ប្រចាំ​ទ្វីប​អឺរ៉ុប​បាន​ប្រាប់ CBS News ថា ប្រសិនបើ​អ្នក​ក្រឡេក​មើល​រយៈពេល ៤​សប្ដាហ៍​ចុងក្រោយ​នេះការ​ចូល​សម្រាក​ព្យាបាល​នៅ​មន្ទីរពេទ្យ​បាន​កើន​ឡើង​ទ្វេដង។

​លោក​បាន​និយាយ​ថា ការ​ចាក់​វ៉ាក់សាំង​បង្ការ​បាន​ឡើង​ខ្ពស់​នៅ​ក្នុង​តំបន់​មួយ​ចំនួន​នៃ​ទ្វីប​អឺរ៉ុប ហើយក្នុង​ពេល​ជាមួយគ្នា​នោះ​ដែរមានការ​បន្ធូរបន្ថយ​វិធានការ​សុខភាព​សាធារណៈ និង​សង្គម ដែល​ជា​កត្តា​ជំរុញ​ឲ្យ​យើង​មើល​ឃើញ​ថា​នឹង​មាន​រលក​ទី៤​។​ គិត​ត្រឹម​ព្រឹក​ថ្ងៃ​អង្គារ​នេះ​សហរដ្ឋអាមេរិក​មាន​ករណី​ឆ្លង​វីរុស COVID-19 សរុប​ចំនួន ៤៧,៤១៣,៣៥១​នាក់​បន្ទាប់ពី​មាន​ករណី​ឆ្លង​ថ្មី​ចំនួន ៣៩,២៤៥​នាក់​បន្ថែម​ទៀត ខណៈ​អ្នក​ស្លាប់​មាន​ចំនួន ៧៧៥​,៩១៦​នាក់​បន្ទាប់ពី​មាន​អ្នក​ស្លាប់​ថ្មី​ចំនួន ៣២០នាក់​៕

អត្ថបទ៖ សុខមាន