កងជីវពលហ៊ួទីរបស់ប្រទេសយេម៉ែន បានបង្ហាញថា ពួកគេនឹងដាក់កម្រិតការវាយប្រហាររបស់ពួកគេ នៅក្នុងច្រករបៀងសមុទ្រក្រហមសម្រាប់តែនាវាដែលពាក់ព័ន្ធជាមួយអ៊ីស្រាអែលប៉ុណ្ណោះ ខណៈដែលបទឈប់បាញ់មួយនៅតំបន់ហ្កាហ្សាស្ទ្រីប បានចូលជាធរមាន

ក្រុមហ៊ួទីបានធ្វើសេចក្តីប្រកាស នៅក្នុងអ៊ីមែលផ្ញើទៅកាន់អ្នកដឹកជញ្ជូន និងអ្នកដទៃកាលពីថ្ងៃអាទិត្យ។ ក្រុមនេះ បានគ្រោងទុកដោយឡែកពីគ្នានូវសេចក្តីថ្លែងការណ៍យោធាមួយ នៅថ្ងៃចន្ទនេះ ដែលទំនងជាអំពីការសម្រេចចិត្តរបស់ខ្លួន។

តាមរយៈមជ្ឈមណ្ឌលសម្របសម្រួលប្រតិបត្តិការមនុស្សធម៌របស់ពួកគេ ក្រុមហ៊ួទី បានធ្វើសេចក្តីប្រកាសដោយនិយាយថា ខ្លួនកំពុង «បញ្ឈប់ការដាក់ទណ្ឌកម្ម» លើនាវាផ្សេងទៀត ដែលខ្លួនបានកំណត់គោលដៅពីមុន ចាប់តាំងពីខ្លួនបានចាប់ផ្តើមការវាយប្រហារ នៅក្នុងខែវិច្ឆិកា ឆ្នាំ ២០២៣។

ក្រុមហ៊ួទី បានកំណត់គោលដៅលើនាវាជំនួញប្រហែល ១០០គ្រឿង ជាមួយនឹងមីស៊ីល និងយានដ្រូន ចាប់តាំងពីសង្រ្គាមអ៊ីស្រាអែល-ហាម៉ាស នៅតំបន់ហ្គាហ្សាស្ទ្រីប បានចាប់ផ្តើមនៅក្នុងខែតុលា ឆ្នាំ ២០២៣ បន្ទាប់ពីការវាយប្រហារដ៏គួរឲ្យភ្ញាក់ផ្អើលរបស់ហាម៉ាស ទៅលើអ៊ីស្រាអែល ដែលបានសម្លាប់មនុស្ស ១.២០០នាក់ និងឃើញមនុស្ស ២៥០នាក់ផ្សេងទៀត ត្រូវបានចាប់ធ្វើជាចំណាប់ថ្នូរ។