ក្រសួងការបរទេសចិន បានឲ្យដឹងថា យោធាមីយ៉ាន់ម៉ា និងកងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ា (MNDAA) បានចុះហត្ថលេខាលើកិច្ចព្រមព្រៀងផ្លូវការមួយ ដើម្បីឲ្យមានបទឈប់បាញ់ដែលបានចាប់ផ្តើម កាលពីថ្ងៃសៅរ៍ចុងសប្ដាហ៍កន្លងមក ដោយបញ្ឈប់ការប្រយុទ្ធគ្នា នៅជិតព្រំដែននៃប្រទេសទាំង២។

អំឡុងសន្និសីទសារព័ត៌មាន នាថ្ងៃចន្ទ (ទី២០ ខែមករា) នេះ អ្នកនាំពាក្យក្រសួង លោកស្រី Mao Ning បាននិយាយថា ភាគីទាំង២ បានជួបចរចាគ្នា នៅទីក្រុង Kunming ភាគនិរតីរបស់ប្រទេសចិន ជាកន្លែងដែលពួកគេបានថ្លែងអំណរគុណដល់ទីក្រុងប៉េកាំង សម្រាប់កិច្ចប្រឹងប្រែងជួយលើកកម្ពស់សន្តិភាព។

លោកស្រីបាននិយាយថា៖ «ការធ្វើឲ្យស្ថានការណ៍ នៅភាគខាងជើងរបស់សហភាពមីយ៉ាន់ម៉ា មានភាពស្ងប់ស្ងាត់ គឺជាផលប្រយោជន៍រួមរបស់ភាគីទាំងអស់ ទាំងក្នុងប្រទេសមីយ៉ាន់ម៉ា និងបណ្ដាប្រទេស នៅក្នុងតំបន់ ហើយរួមចំណែកដល់សន្តិសុខ ស្ថិរភាព និងការអភិវឌ្ឍនៃតំបន់ព្រំដែន រវាងប្រទេសចិន និងមីយ៉ាន់ម៉ា»។

លោកស្រី Mao បានបញ្ជាក់បន្ថែមថា ប្រទេសចិននឹងបន្តជំរុញយ៉ាងសកម្មដល់សន្តិភាព និងការសន្ទនាគ្នា ព្រមទាំងផ្តល់ការគាំទ្រ និងជំនួយដល់ដំណើរការសន្តិភាព នៅភាគខាងជើងសហភាពមីយ៉ាន់ម៉ា។

MNDAA គឺជាក្រុមប្រដាប់អាវុធជនជាតិភាគតិចមួយ ក្នុងចំណោមក្រុមប្រដាប់អាវុធជនជាតិភាគតិចជាច្រើន ដែលកំពុងប្រយុទ្ធ ដើម្បីវាយរុញច្រានកងកម្លាំងរបស់របបយោធាឲ្យថយចេញពីអ្វីដែលពួកគេចាត់ទុកថា ជាដែនដីរបស់ខ្លួន។

ក្រុមនេះ គឺជាផ្នែកមួយនៃអ្វីដែលហៅថា សម្ព័ន្ធបងប្អូនទាំង៣ ដែលមានកងទ័ពរំដោះជាតិតាអុង (TNLA) និងកងទ័ពអារ៉ាកាន (AA) ដែលបានបើកការវាយលុកប្រឆាំងនឹងរបបយោធា កាលពីចុងខែតុលា ឆ្នាំ២០២៣ ដោយដណ្តើមកាន់កាប់ដែនដីជាច្រើន នៅជិតព្រំដែនជាមួយប្រទេសចិន៕