នៅថ្ងៃចន្ទនេះ ប្រជាពលរដ្ឋអ៊ុយក្រែន បានបង្ហាញភាពមន្ទិលសង្ស័យរបស់ពួកគេចំពោះលទ្ធភាពដែលប្រធានាធិបតីជិតឡើងកាន់តំណែងសហរដ្ឋអាមេរិកលោក Donald Trump អាចបញ្ឈប់សង្រ្គាមជាមួយរុស្ស៊ី មុនពិធីស្បថចូលកាន់តំណែងរបស់លោក ។

លោក Halyna Kraskivska គឺជាអ្នកគ្រប់គ្រងវ័យ ៣២ឆ្នាំមួយរូបរស់នៅក្នុងទីក្រុងគីវ និយាយថា ពួកយើងចង់សង្ឃឹមថា លោក Trump នឹងក្លាយជាមនុស្សម្នាក់ដែលអាចជួយពួកយើងបញ្ចប់សង្រ្គាម ប៉ុន្តែពួកយើងនៅតែនៅពុំទាន់ច្បាស់ក្នុងចិត្តថាវានឹងកើតឡើងឬយ៉ាងណា ។

ដោយឡែក នាង Soffia Dmytrenko គឺជានិស្សិតមួយរូប មិនជឿថានឹងមានអ្វីផ្លាស់ប្តូរនោះទេ ក្រោយលោក Trump ឡើងកាន់អំណាច ។

ចំណែកឯលោក Dmytro គឺជាពលរដ្ឋមួយរូបរស់នៅក្នុងទីក្រុង Kharkiv សង្ឃឹមថា សង្រ្គាមនឹងបញ្ចប់ក្នុងពេលដ៏ខ្លីខាងមុខនេះ ដោយលោកនិយាយថា លោក Putinគឺជាឧក្រិដ្ឋជន ប៉ុន្តែលែងមានមនុស្ស និងអាវុធសេសសល់សម្រាប់ច្បាំងគ្នាទៀតហើយ ។

សូមបញ្ជាក់ថា លោក Trump បានអះអាងអំឡុងយុទ្ធនាការស្វែងរកសំឡេងឆ្នោតរបស់លោកថា លោកនឹងបញ្ចប់សង្រ្គាមរុស្ស៊ី-អ៊ុយក្រែន នៅថ្ងៃដំបូងនៃការកាន់អំណាចរបស់លោក ប៉ុន្តែក្រុមទីប្រឹក្សារបស់លោកទទួលស្គាល់ថា រាល់កិច្ចព្រមព្រៀងសន្តិភាពណាមួយនឹងត្រូវការចំណាយពេលច្រើនខែ ៕