មន្ត្រី និងប្រជាជនសាមញ្ញរបស់ប្រទេសចិន មានក្តីសង្ឃឹម ប៉ុន្តែអន្ទះអន្ទែង ពោលគឺមានអារម្មណ៍មិនស្រណុក នៅពេលដែលលោក Donald Trump វិលត្រលប់ទៅអង្គុយកៅសេតវិមានវិញ ក្នុងនាមជាប្រធានាធិបតីអាមេរិក ដោយចង់បានយ៉ាងខ្លាំងក្លាមិនចង់ឲ្យកើតជាថ្មីម្តងទៀតនូវសង្រ្គាមពាណិជ្ជកម្មដ៏ស្រួចស្រាល់ ដែលបាននាំឲ្យមានជម្លោះ រវាងប្រទេសមហាអំណាចសេដ្ឋកិច្ចទាំង២ អំឡុងអាណត្តិដំបូងរបស់លោក។

យោងតាមទីភ្នាក់ងារព័ត៌មានផ្លូវការ Xinhua បានឲ្យដឹងថា ក្នុងជំនួបជាមួយនាយកប្រតិបត្តិក្រុមហ៊ុន Tesla លោក Elon Musk និងសមាជិកដទៃទៀតនៃសហគមន៍ធុរកិច្ចអាមេរិក ក្នុងទីក្រុងវ៉ាស៊ីនតោន នៅមុនថ្ងៃឡើងកាន់តំណែងរបស់លោក Trump អនុប្រធានាធិបតីចិន លោក Han Zheng បាននិយាយថា លោកសង្ឃឹមថា ក្រុមហ៊ុនអាមេរិក នឹងបង្ហាញវត្តមានយ៉ាងរឹងមាំ នៅប្រទេសចិន និងជួយធ្វើឲ្យទំនាក់ទំនងទ្វេភាគីមានស្ថិរភាព។

គួររំលឹកថា នៅពេលដែលលោក Trump បានធ្វើជាប្រធានាធិបតីកាលពីមុន លោកបានដំឡើងពន្ធលើការនាំចូលរបស់ចិនគិតជាទឹកប្រាក់ជាង ៣០០ពាន់លានដុល្លារ។ ក្នុងរយៈពេលប៉ុន្មានខែថ្មីៗនេះ លោកបាននិយាយថា លោកនឹងដំឡើងពន្ធគយយ៉ាងហោចណាស់ ១០ភាគរយបន្ថែមពីលើអ្វីដែលបានដាក់រួចហើយលើទំនិញរបស់ចិន ជាចំណាត់ការដែលនឹងធ្វើឲ្យប៉ះពាល់ដល់ចិន នៅពេលដែលសេដ្ឋកិច្ចរបស់ ប្រទេសនេះ កំពុងជួបការលំបាកក្នុងការបង្កើតភាពរឹងមាំ។

ក្នុងពេលជាមួយគ្នានោះ ប្រធានាធិបតីជាប់ឆ្នោតរបស់សហរដ្ឋអាមេរិក បានចាត់វិធានាការដែលហាក់ដូចជាបង្ហាញពីការស្រុះស្រួលគ្នា ដោយការអញ្ជើញប្រធានាធិបតីចិន លោក ស៊ី ជីនពីង (Xi Jinping) ចូលរួមពិធីស្បថឡើងកាន់តំណែងរបស់លោក នៅថ្ងៃចន្ទនេះ។ លោក ស៊ី បានបញ្ជូនលោក Han ឲ្យចូលរួមជំនួសលោក ជាកាយវិការនៃសុច្ឆន្ទៈ ពីព្រោះថា ប្រទេសចិនមានត្រឹមតែតំណាងជាឯកអគ្គរដ្ឋទូតរបស់ខ្លួនប៉ុណ្ណោះ នៅក្នុងពិធីចូលកាន់តំណែងជាប្រធានាធិបតីអាមេរិក កាលពី ២លើកកន្លងមក។

ក្នុងជំនួប កាលពីថ្ងៃអាទិត្យ ដោយនិយាយទៅកាន់លោក Musk ដែលត្រូវបានតែងតាំងដោយលោក Trump ឲ្យដឹកនាំស្ថាប័នមួយដែលមានគោលបំណងធ្វើឲ្យរដ្ឋាភិបាលអាមេរិកប្រសិទ្ធភាពជាងមុន លោក Han បានប្រាប់ថា លោក «ស្វាគមន៍ក្រុមហ៊ុន Tesla និងក្រុមហ៊ុនអាមេរិកផ្សេងទៀត» ដែលចូលរួមក្នុងអត្ថប្រយោជន៍នៃការអភិវឌ្ឍរបស់ប្រទេសចិន និងរួមចំណែកដល់ទំនាក់ទំនងចិន-សហរដ្ឋអាមេរិក៕