ក្រុមមន្រ្តីនិយាយថា មនុស្ស ៨នាក់ បានស្លាប់ នៅក្នុងហេតុការណ៍អគ្គិភ័យឆាបឆេះផ្ទះសម្រាប់មនុស្សចាស់ជរា នៅតំបន់ជាយក្រុងរដ្ឋធានី Belgrade របស់ប្រទេសស៊ែរប៊ី ដែលគេសង្ស័យថា ត្រូវបានលួចដុតបំផ្លាញដោយអ្នកស្រុកម្នាក់ ។

ទូរទស្សន៍រដ្ឋ RTS រាយការណ៍ថា មនុស្ស ៧នាក់ផ្សេងទៀត បានរងរបួសនៅក្នុងហេតុការណ៍អគ្គិភ័យឆាបឆេះនេះ ដែលបានកើតឡើងកាលពីវេលាម៉ោង ៣ និង ៣០នាទី ម៉ោងក្នុងស្រុក នៅតំបន់ជាយក្រុង Barajevo ស្ថិតនៅភាគខាងត្បូងទីក្រុង Belgrade ។

លោក Nemanja Starovic គឺជារដ្ឋមន្រ្តីថែទាំសង្គមស៊ែរប៊ី និយាយថា ក្រុមការងារសង្រ្គោះបន្ទាន់ បានឆ្លើយតបភ្លាមៗនឹងហេតុការណ៍អគ្គិភ័យនេះ ប៉ុន្តែអកុសល អណ្តាតភ្លើងបានសម្លាប់មនុស្ស ៨នាក់រួចទៅហើយ ។

នគរបាលស៊ែរប៊ី និយាយនៅក្នុងសេចក្តីថ្លែងការណ៍ថា មនុស្សប្រហែល ៣០នាក់ ស្ថិតនៅក្នុងផ្ទះ ពេលដែលអគ្គិភ័យ បានឆាបឆេះឡើង ៕