តុលាការឥណ្ឌា នៅថ្ងៃចន្ទ (ទី២០ ខែមករា) នេះ បានសម្រេចឲ្យជាប់ពន្ធនាគារអស់មួយជីវិត ចំពោះនគរបាលស្ម័គ្រចិត្តម្នាក់ដែលត្រូវបានផ្ដន្ទាទោសពីបទរំលោភ និងសម្លាប់គ្រូពេទ្យហាត់ការម្នាក់ ក្នុងមន្ទីរពេទ្យដែលនាងធ្វើការ នៅភាគខាងកើតនៃទីក្រុង Kolkata ដោយបដិសេធការទាមទារឲ្យមានការកាត់ទោសប្រហារជីវិត ដោយលើកឡើងថា នេះមិនមែនជាបទឧក្រិដ្ឋដែលមានលក្ខណៈកម្រ ដើម្បីឈានដល់ការកាត់ទោសបែបនេះឡើយ។

គួររំលឹកថា សពស្ត្រីរងគ្រោះនេះត្រូវបានរកឃើញនៅក្នុងបន្ទប់រៀនមួយ ក្នុងមហាវិទ្យាល័យវេជ្ជសាស្ត្រ និងមន្ទីរពេទ្យឈ្មោះ R G Kar ដែលគ្រប់គ្រងដោយរដ្ឋ កាលពីថ្ងៃទី៩ ខែសីហាឆ្នាំមុន។ ហេតុការណ៍នោះ បាននាំឲ្យគ្រូពេទ្យផ្សេងទៀតឈប់ធ្វើការជាច្រើនសប្តាហ៍ ដើម្បីទាមទារយុត្តិធម៌ឲ្យរូបនាង និងទាមទារឲ្យមានសន្តិសុខប្រសើរជាងមុន នៅក្នុងមន្ទីរពេទ្យរដ្ឋ ខណៈដែលឧក្រិដ្ឋកម្មនេះ បានបង្កឲ្យមានការខឹងសម្បាទូទាំងប្រទេស ដោយសារកង្វះខាតការផ្ដល់សុវត្ថិភាពដល់ស្ត្រី។

លោក Sanjay Roy ដែលជានគរបាលស្ម័គ្រចិត្ត ត្រូវបានកាត់ឲ្យជាប់ទោសដោយចៅក្រម លោក Anirban Das កាលពីថ្ងៃទី១៨ ខែមករា ដោយលោកចៅក្រមបាននិយាយថា ភស្តុតាងដោយប្រយោល បានជួយគាំទ្រដល់ការចោទប្រកាន់ ចំពោះលោក Roy។ លោក Roy បាននិយាយថា លោកគ្មានកំហុសឡើយ ហើយថា រូបលោកត្រូវបានគេរៀបចំឲ្យទទួលទោស និងបានស្វែងរកការលើកលែងទោស។

នគរបាលសហព័ន្ធដែលបានស៊ើបអង្កេតករណីនេះ បានប្រាប់ឲ្យដឹងថា ឧក្រិដ្ឋកម្មនេះ គឺជាប្រភេទបទល្មើស «ដ៏កម្របំផុត» ហើយហេតុដូច្នេះ លោក Roy សមនឹងទទួលទោសប្រហារជីវិត។

តែចៅក្រមបានលើកឡើងថា លោកបានសន្និដ្ឋានថា នេះមិនមែនជាឧក្រិដ្ឋកម្មដ៏កម្របំផុតនោះទេ បន្ទាប់ពីបានពិចារណាលើភស្តុតាង និងព្រឹត្តិការណ៍ដែលជាប់ពាក់ព័ន្ធទាំងអស់។ លោកបាននិយាយថា លោក Roy អាចនឹងប្តឹងឧទ្ធរណ៍ទៅតុលាការជាន់ខ្ពស់៕