សមាជិកសភាជាន់ខ្ពស់រុស្ស៊ីមួយរូប នាថ្ងៃចន្ទ (ទី២០ ខែមករា) នេះ បានប្រាប់ទូរទស្សន៍រដ្ឋថា សហរដ្ឋអាមេរិក បានផ្ដល់ដំណឹងដល់ប្រទេសរុស្ស៊ីថា ខ្លួនបានផ្តល់ការយល់ព្រម ចំពោះការតែងតាំងឯកអគ្គរដ្ឋទូតរុស្សីថ្មី ប្រចាំទីក្រុងវ៉ាស៊ីនតោន។

ប្រមុខគណៈកម្មាធិការកិច្ចការអន្តរជាតិ ក្នុងក្រុមប្រឹក្សាសហព័ន្ធ ដែលជាសភាជាន់ខ្ពស់របស់រុស្ស៊ី គឺលោក Grigory Karasin បាននិយាយថា ឯកអគ្គរដ្ឋទូតថ្មី អាចនឹងត្រូវបានតែងតាំងជាផ្លូវការ ក្នុងប៉ុន្មានសប្តាហ៍ខាងមុខនេះ។

តែអ្នកនាំពាក្យក្រសួងការបរទេស អ្នកស្រី Maria Zakharova បានប្រាប់ទីភ្នាក់ងារព័ត៌មានរដ្ឋ TASS ថា៖ «កិច្ចព្រមព្រៀងនេះមិនទាន់ត្រូវបានទទួលនៅឡើយទេ»។

យ៉ាងណាក្ដី ទាំងលោក Karasin និងលោកស្រី Zakharova មិនបានប្រាប់ឈ្មោះឯកអគ្គរដ្ឋទូតថ្មីនោះទេ។ ឯកអគ្គរដ្ឋទូតរុស្ស៊ីចុងក្រោយប្រចាំនៅសហរដ្ឋអាមេរិក គឺលោក Anatoly Antonov បានចាកចេញពីមុខតំណែង កាលពីខែតុលាឆ្នាំមុន។

សារព័ត៌មាន Kommersant បានរាយការណ៍កាលពីខែវិច្ឆិកាឆ្នាំមុនថា ប្រទេសរុស្ស៊ីនឹងតែងតាំងលោក Alexander Darchiev ដែលជាប្រធាននាយកដ្ឋានអាមេរិកខាងជើងរបស់ក្រសួងការបរទេសជាឯកអគ្គរដ្ឋទូតថ្មីរបស់ខ្លួន ប្រចាំនៅទីក្រុងវ៉ាស៊ីនតោន៕