ប្រជាជនក្នុងប្រទេសមួយចំនួនលើពិភពលោកបានចេញតវ៉ាតាមដងផ្លូវនានាបន្ទាប់ពីលោក Donald Trump បានស្បថចូលកាន់តំណែងជាប្រធានាធិបតីអាមេរិកទី៤៧កាលពីថ្ងៃចន្ទដើមសប្ដាហ៍នេះ។

នៅក្នុងសហរដ្ឋអាមេរិកខ្លួនឯង ក្រុមបាតុកររាប់រយនាក់បានប្រមូលផ្តុំគ្នានៅទីក្រុងវ៉ាស៊ីនតោនឌីស៊ី    ខណៈលោកប្រធានាធិបតី Trump កំពុងតែស្បថចូលកាន់តំណែងកាលពីថ្ងៃចន្ទ ហើយមនុស្សជាច្រើនបានប្រាប់ទូរទស្សន៍ Fox News Digitalរបស់សហរដ្ឋអាមេរិក ថាពួកគេបានព្យាយាមអត់ធ្មត់នឹងសីតុណ្ហភាពត្រជាក់ដើម្បីនិយាយប្រឆាំងនឹង "អាណានិគមនិយម" និង "ហ្វាស៊ីសនិយម" ដែលពួកគេជឿថានឹងកើតឡើងនៅក្រោមអាណត្តិរបស់លោក Trump ។

ចំណែកនៅប្រទេសម៉ិកស៊ិកឯណោះវិញ ក្រុមបាតុករបានដុតរូបតំណាងរបស់ប្រធានាធិបតីទើបចូលកាន់តំណែងថ្មីលោក Donald Trump នៅខាងក្រៅស្ថានទូតអាមេរិកក្នុងទីក្រុងម៉ិកស៊ិក ដើម្បីតវ៉ាចំពោះអាណត្តិថ្មីរបស់លោក និងគោលនយោបាយប្រឆាំងជនអន្តោប្រវេសន៍កាលពីថ្ងៃចន្ទ ២០ មករា។ ក្រុមអ្នកតវ៉ាបានប្រមូលផ្តុំគ្នានៅខាងក្រៅស្ថានទូត និងបានវាយដំរូបតំណាង ដែលសំដៅលើលោក Donald Trump ដោយប្រើដំបងឈើ រួចដុតចោល។

នៅឯប្រទេសប៉ាណាម៉ាវិញ បន្ទាប់ពីលោកប្រធានាធិបតី Donald Trump បាននិយាយម្តងទៀតក្នុងអំឡុងពេលសុន្ទរកថាបើកឡើងកាន់អំណាចរបស់លោកថា រូបនឹងស្វែងរកការគ្រប់គ្រងព្រែកជីកប៉ាណាម៉ាឡើងវិញ ក្រុមកម្មករសហជីពបានហែក្បួនកាលពីថ្ងៃចន្ទ២០ មករា ទៅកាន់គេហដ្ឋានរបស់ឯកអគ្គរដ្ឋទូតសហរដ្ឋអាមេរិកនៅទីក្រុងប៉ាណាម៉ាដើម្បីតវ៉ានឹងការគំរាមកំហែងរបស់ប្រធានាធិបតីរូបនេះ។

នៅក្នុងទឹកដីសហភាពអឺរ៉ុប ក្រុមបាតុករធ្វើបាតុកម្មប្រឆាំងនឹងលោក Trump នៅខាងក្រៅស្ថានទូតអាមេរិកក្នុងទីក្រុងព្រុចសែល។ យ៉ាងហោចណាស់មនុស្ស១៥០ នាក់បានប្រមូលផ្តុំគ្នាកាលពីថ្ងៃចន្ទ ២០ មករា នៅខាងក្រៅស្ថានទូតអាមេរិកនៅទីក្រុងប្រ៊ុចសែលប្រទេសបែលហ្ស៊ិក ដើម្បីតវ៉ាប្រឆាំងនឹងការឡើងកាន់តំណែងរបស់លោក Donald Trump ជាប្រធានាធិបតីទី៤៧ របស់សហរដ្ឋអាមេរិក។

អ្នកចូលរួមការតវ៉ាម្នាក់បាននិយាយថារូបគេមានក្ដីបារម្ភខ្លាំងចំពោះបញ្ហាជាច្រើន ដូចជាអាកាសធាតុជាដើមមិនត្រឹមតែបញ្ហាសិទ្ធិមនុស្សប៉ុណ្ណោះទេ ។រូបគេបារម្ភថាកត្តាបច្ចេកវិទ្យានឹងក្លាយជាបញ្ហាធំទាំងនៅក្នុងតំបន់អឺរ៉ុប និងសហរដ្ឋអាមេរិកខ្លួនឯង៕