ប្រធានាធិបតីអាមេរិកលោក Donald Trump កាលពីថ្ងៃចន្ទបានចុះហត្ថលេខាលើក្រឹត្យមួយដោយស្វែងរកការពន្យារពេល៧៥ ថ្ងៃចំពោះការអនុវត្តន៍ការហាមប្រាមកម្មវិធីបង្ហោះវីដេអូកម្សាន្តខ្លីៗដ៏ពេញនិយម TikTok ដែលបានដល់កាលកំណត់បិទដំណើរការAppនេះនៅថ្ងៃទី១៩ ខែមករា២០២៥នេះ ។

ក្រឹត្យនេះ បានណែនាំដល់ក្រសួងយុត្តិធម៌កុំឱ្យរដ្ឋបាលរបស់លោករឹតត្បិតសកម្មភាពសមស្របទាក់ទងនឹងបណ្ដាញសង្គមTikTok នេះ។

ក្រឹត្យនេះក៏ណែនាំដល់ក្រសួងយុត្តិធម៌ផងដែរឱ្យចេញលិខិតជូនដំណឹងទៅកាន់ក្រុមហ៊ុនដូចជា Apple, Google របស់ Alphabet និង Oracle ដែលធ្វើការជាមួយ TikTok ដោយបញ្ជាក់ថាមិនមានការរំលោភលើលក្ខន្តិកៈ និងថាមិនមានការទទួលខុសត្រូវចំពោះការប្រព្រឹត្តណាមួយដែលបានកើតឡើងក្នុងអំឡុងពេលដែលបានកំណត់ខាងលើនោះឡើយ។

លោក Trump បាននិយាយថា ក្រឹត្យនេះគ្រាន់តែផ្តល់ឱ្យលោកនូវសិទ្ធិក្នុងការលក់បណ្ដាញសង្គមនេះ ឬបិទចោលមិនឲ្យមាននៅអាមេរិកប៉ុណ្ណោះ ដោយបន្ថែមថាលោកចាំបាច់ត្រូវសម្រេចចិត្តឲ្យបានហ្មត់ចត់ចំពោះករណីនេះ។

គួររម្លឹកថា ក្នុងរដ្ឋបាលចាស់របស់លោកBidenបានបង្ខំឲ្យបណ្ដាញកម្មវិធីកម្សាន្តរបស់ចិនមួយនេះ លក់ឲ្យអាមេរិក ពុំនោះនឹងត្រូវបិទដំណើរនៅអាមេរិក ដោយលើកឡើងពីក្ដីបារម្ភជុំវិញបញ្ហាសន្តិសុខជាតិរបស់ខ្លួន៕