ការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា រថយន្តជំនួយចំនួន ៩១៥គ្រឿង បានចូលទៅក្នុងតំបន់ហ្កាហ្សាស្ទ្រីប កាលពីថ្ងៃចន្ទ ២០ មករា ដែលជាថ្ងៃទីពីរនៃបទឈប់បាញ់រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស បន្ទាប់ពីសង្គ្រាមរយៈពេល ១៥ខែ។

OCHA បានដកស្រង់ព័ត៌មានពីអ៊ីស្រាអែល និងអ្នកធានាបទឈប់បាញ់ សហរដ្ឋអាមេរិក កាតា និងអេហ្ស៊ីប ខណៈកាលពីថ្ងៃអាទិត្យ អង្គការសហប្រជាជាតិនិយាយថា រថយន្តជំនួយប្រមាណ ៦៣០គ្រឿង បានចូលក្នុងតំបន់ប៉ាឡេស្ទីននេះ ជាមួយនឹងរថយន្តយ៉ាងហោចណាស់ ៣០០គ្រឿង នឹងទៅភាគខាងជើង ជាទីដែលអ្នកជំនាញបានព្រមានអំពីគ្រោះទុរ្ភិក្ស។

គួរបញ្ជាក់ថា កិច្ចព្រមព្រៀងឈប់បាញ់ តម្រូវឱ្យរថយន្តដឹកទំនិញចំនួន ៦០០គ្រឿង ត្រូវអនុញ្ញាតឱ្យចូលទៅហ្កាហ្សា ជារៀងរាល់ថ្ងៃនៃបទឈប់បាញ់ ៦សប្តាហ៍ដំបូង រួមទាំងរថយន្តជំនួយប្រេង ៥០គ្រឿង ដោយពាក់កណ្តាលនៃរថយន្តជំនួយចំនួន ៦០០គ្រឿងនោះ នឹងត្រូវបញ្ជូនទៅភាគខាងជើងនៃតំបន់ហ្កាហ្សា។

ទិន្នន័យពីទីភ្នាក់ងារសង្គ្រោះប៉ាឡេស្ទីន UNRWA បង្ហាញថា រថយន្តជំនួយចំនួន ២.៨៩២ គ្រឿងបានចូលក្នុងតំបន់ហ្កាហ្សាក្នុងខែធ្នូ ខណៈជំនួយត្រូវបានទម្លាក់នៅខាងព្រំដែនហ្កាហ្សា បន្ទាប់មកត្រូវបានទទួលយកដោយអង្គការសហប្រជាជាតិ ហើយចែកចាយបន្តដល់អ្នករងគ្រោះ៕