អ្នកគាំទ្ររាប់សិបនាក់របស់ប្រធានាធិបតីកូរ៉េខាងត្បូង លោក Yoon Suk Yeol កំពុងប្រឈមនឹងការចោទប្រកាន់កាលពីថ្ងៃចន្ទ បន្ទាប់ពីបានសម្រុកចូលអគារតុលាការ។ ក្រុមបាតុករ ដែលមួយចំនួនបំផ្លាញខ្សែបន្ទាត់របស់នគរបាលដោយបំពង់ពន្លត់អគ្គិភ័យ ឬកាន់កាប់កំណាត់របាំងការពារបានសម្រុកចូលទៅតុលាការក្រុងសេអ៊ូលភាគខាងលិច។

បញ្ហានេះបានកើតឡើង បន្ទាប់ពីសេចក្តីសម្រេចរបស់តុលាការ ឱ្យបន្តដំណើរការឃុំខ្លួនលោកYoonជាផ្លូវការ ជាផ្នែកមួយនៃការស៊ើបអង្កេតបទព្រហ្មទណ្ឌ ថាតើលោកបានប្រព្រឹត្តការបះបោរដែរឬយ៉ាងណា។ កាលពីសប្តាហ៍មុន លោក Yoon បានក្លាយជាប្រធានាធិបតីកូរ៉េខាងត្បូងដំបូងគេដែលត្រូវបានចាប់ខ្លួន ជុំវិញការប្រកាសច្បាប់អាជ្ញាសឹករយៈពេលខ្លីរបស់លោក។

ក្នុងចំណោមមនុស្ស៩០នាក់ដែលត្រូវបានឃុំខ្លួនបន្ទាប់ពីការប៉ះទង្គិចគ្នា ទីភ្នាក់ងារសារព័ត៌មានយ៉ុនហាប់ បានរាយការណ៍ថា នគរបាលមានផែនការបន្តឃុំខ្លួនមនុស្សចំនួន៦៦នាក់ដោយចោទប្រកាន់ពីបទរំលោភលើតំបន់ហាមឃាត់ រារាំងកាតព្វកិច្ចផ្លូវការ និងវាយដំមន្ត្រីនគរបាល។

អាជ្ញាធរបាននិយាយថា សន្តិសុខត្រូវបានបង្កើននៅមណ្ឌលឃុំឃាំងទីក្រុងសេអ៊ូល ជាកន្លែងដែលលោក Yoon កំពុងត្រូវបានឃុំខ្លួន និងនៅតុលាការធម្មនុញ្ញដែលការជម្រះក្តីបទចោទប្រកាន់ កំពុងត្រូវបានធ្វើឡើង។

ទន្ទឹមនឹងនេះ កាលពីថ្ងៃចន្ទ លោក Yoon បានបដិសេធមិនបង្ហាញខ្លួនសម្រាប់ការសាកសួរនៅការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) ដែលកំពុងដឹកនាំការស៊ើបអង្កេតបទព្រហ្មទណ្ឌ នេះទេ។

លោកបានបដិសេធម្តងហើយម្តងទៀតក្នុងការសហការ ដោយមេធាវីរបស់លោកអះអាងថាការចាប់ខ្លួនលោក និងដីកាដែលចេញសម្រាប់ការឃុំខ្លួន គឺខុសច្បាប់ ហើយការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ ពុំមានសិទ្ធិស្របច្បាប់ក្នុងការស៊ើបអង្កេតនោះទេ។