បាល់ទាត់៖ គ្រូបង្វឹកក្រុមបាល់ទាត់នារីភ្នំពេញក្រោន ម៉ៅ សាវីន បានដាក់គោលដៅដណ្ដើមជើងឯកលីគបាល់ទាត់នារីឆ្នាំ២០២១ ឲ្យខានតែបាន ទោះបីបច្ចុប្បន្នក្រុមរបស់អ្នកគ្រូរៀបចំ ក៏ដូចជាត្រៀមខ្លួនពុំទាន់បានល្អប្រសើរក៏ដោយ។ អ្នកគ្រូ ម៉ៅ សាវីន បានសម្ដែងការសប្បាយចិត្តជាខ្លាំងក្រោយលីគបាល់ទាត់នារីត្រឡប់មកវិញ បន្ទាប់ពីខកខានសកម្មភាពស្ទើរ ១ឆ្នាំពេញដោយសារវិបត្តិកូវីដ-១៩។
ប៉ុន្ដែចំពោះការរៀបចំរបស់ក្រុមខ្លួនគឺពុំសូវល្អប្រសើរនោះទេ តែយ៉ាងណាអ្នកគ្រូ និងកូនក្រុមបានប្ដេជ្ញាចិត្តនឹងធ្វើឲ្យបានល្អឈានទៅប្រជែងជើងឯក ក្រោយទទួលបានត្រឹមចំណាត់ថ្នាក់លេខ៣ បន្ទាប់ពីចាញ់ព្រះខ័នរាជស្វាយរៀងក្នុងវគ្គពាក់កណ្ដាលផ្ដាច់ព្រ័ត្រ។ គួរដឹងថា ការប្រកួតជ្រើសរើសជើងឯកបាល់ទាត់នារីឆ្នាំ២០២១ នឹងបែងចែកការប្រកួតជា ២ដំណាក់កាល ទី១-ការប្រកួតជម្រុះដែលគ្រោងធ្វើឡើងពីថ្ងៃទី២៥ ដល់ថ្ងៃទី២៧ ខែវិច្ឆិកាខាងមុខ និងដំណាក់កាលទី២ គឺការប្រកួតសន្សំពិន្ទុលក្ខណៈលីគដែលគ្រោងនឹងចាប់ផ្ដើមការប្រកួតពីថ្ងៃទី១៩ ខែធ្នូ ឆ្នាំ២០២១ រហូតដល់ថ្ងៃទី២៧ ខែមីនា ឆ្នាំ២០២២។ បច្ចុប្បន្នសហព័ន្ធកីឡាបាល់ទាត់កម្ពុជាបានធ្វើការទទួលពាក្យក្រុមចូលរួមហើយ តែពុំទាន់ប្រាកដពីចំនួនក្រុមចូលរួមនោះឡើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
