ប្រធានាធិបតីសហរដ្ឋអាមេរិក លោក ដូណាល់ ត្រាំ បានចុះហត្ថលេខាលើក្រឹត្យមួយ ដោយប្តូរឈ្មោះឈូងសមុទ្រម៉ិកស៊ិកទៅជាឈូងសមុទ្រអាមេរិក និងដាក់ឈ្មោះភ្នំ McKinley ឡើងវិញទៅជាភ្នំ Denali ក្នុងរដ្ឋអាឡាស្កា។ ក្រឹត្យដែលបានចុះហត្ថលេខាកាលពីថ្ងៃចន្ទ លើកឡើងពី «ផលប្រយោជន៍ជាតិ» ដើម្បីលើកកម្ពស់បេតិកភណ្ឌរបស់សហរដ្ឋអាមេរិក និង «សាទរកេរ្តិ៍ដំណែលនៃវីរបុរសអាមេរិក»។

ក្រឹត្យនេះ ដាក់ទៅឲ្យរដ្ឋមន្ត្រីក្រសួងមហាផ្ទៃ ចាត់វិធានការសមស្របទាំងអស់ដើម្បីប្តូរឈ្មោះឈូងសមុទ្រម៉ិកស៊ិក ទៅជាឈូងសមុទ្រអាមេរិក ក្នុងខ្ពង់រាបបាតសមុទ្រទ្វីបអាមេរិក។ តំបន់នេះ ជាប់ព្រំប្រទល់នៅភាគឦសាន ភាគខាងជើង និងភាគពាយ័ព្យដោយរដ្ឋតិចសាស់ ល្វីស៊ាណា មីស៊ីស៊ីពី អាឡាបាម៉ា និងរដ្ឋហ្វ្ល័រីដា ហើយលាតសន្ធឹងដល់ព្រំប្រទល់សមុទ្រជាមួយប្រទេសម៉ិកស៊ិក និងគុយបា។

លោករដ្ឋមន្ត្រី មានរយៈពេលពេល៣០ថ្ងៃដើម្បីធ្វើបច្ចុប្បន្នភាពប្រព័ន្ធព័ត៌មានឈ្មោះភូមិសាស្ត្រ ជាមួយនឹងឈ្មោះថ្មីនេះ ដោយធានាថា រាល់ឯកសារយោងទាំងអស់ចំពោះឈូងសមុទ្រម៉ិកស៊ិក ត្រូវបានដាក់ជំនួស ដោយឈូងសមុទ្រអាមេរិកវិញ។

ក្រឹត្យរបស់លោក Trump បាននិយាយថា «តំបន់ដែលពីមុនត្រូវបានគេស្គាល់ថាជាឈូងសមុទ្រម៉ិកស៊ិក គឺជាទ្រព្យសម្បត្តិដ៏សំខាន់មួយសម្រាប់ប្រទេស ហើយនៅតែជាផ្នែកដែលមិនអាចបំបាត់បានរបស់អាមេរិក»។ «ដោយទទួលស្គាល់ធនធានសេដ្ឋកិច្ចមានភាពរីកចម្រើននេះ និងសារៈសំខាន់របស់វាចំពោះសេដ្ឋកិច្ចប្រទេស និងប្រជាជនរបស់យើង ខ្ញុំសូមណែនាំឲ្យគេប្តូរឈ្មោះជាផ្លូវការ ទៅជាឈូងសមុទ្រអាមេរិក»។