ក្រុមអ្នកឧតុនិយមអាមេរិក បានព្រមានកាលពីថ្ងៃចន្ទ ដើមសប្ដាហ៍នេះថា ប្រជាជនរហូតដល់ ២៣៥ លាននាក់នៅក្នុងតំបន់ផ្សេងៗរបស់សហរដ្ឋអាមេរិក ចាប់ពីឆ្នេរឈូងសមុទ្រដល់តំបន់ New England, Great Lakes និង Midwest កំពុងប្រឈមហានិភ័យនៃការដាច់ចរន្តអគ្គិសនី និងរំខានការធ្វើដំណើរដោយសារតែព្យុះរដូវរងាដ៏កម្រមួយដែលមានព្រិលធ្លាក់ខ្លាំង និងការផ្ទុះទឹកកក។ 

សម្រាប់ផ្នែកខ្លះនៃឈូងសមុទ្រភាគខាងលិច និងខាងជើង នេះអាចជាព្យុះព្រិល និងព្យុះទឹកកកដ៏ធំបំផុតក្នុងរយៈពេលជាង ១០០ ឆ្នាំ ហើយអាចជារឿងមួយដែលមនុស្សអាចចងចាំអស់ជាច្រើនទសវត្សរ៍ នេះបើយោងតាមស្ថាប័នតាមដានអាកាសធាតុ AccuWeather ជាគេហទំព័រអាមេរិកដែលផ្តល់ការព្យាករណ៍អាកាសធាតុ និងពេលវេលាជាក់ស្តែង នៃបច្ចុប្បន្នភាពអាកាសធាតុ។

លោក Jonathan Porter ប្រធានឧតុនិយម AccuWeather បាននិយាយថា នេះនឹងក្លាយជាព្យុះរដូវរងាដ៏កម្រ និងគ្រោះថ្នាក់ជាពិសេសនៅតាមបណ្តោយឆ្នេរឈូងសមុទ្រខាងលើ ដែលនឹងបណ្តាលឱ្យមានការរំខានជាខ្លាំង និងយូរអង្វែងក្នុងការធ្វើដំណើរ។

លោក Porter បានបន្ថែមថា បណ្តាញអគ្គិសនីនៅភាគកណ្តាល និងភាគខាងកើតរបស់សហរដ្ឋអាមេរិក អាចត្រូវបានប៉ះពាល់ធ្ងន់ធ្ងរ នៅពេលមនុស្សរាប់រយលាននាក់ត្រូវការកម្ដៅខ្លួន។

ទីក្រុងធំៗជាច្រើននៅភាគខាងត្បូងសហរដ្ឋអាមេរិក រួមទាំង ទីក្រុង Austinរដ្ឋ Texas ទីក្រុង New Orleans រដ្ឋ ល្វីស៊ីណា (Louisiana) ទីក្រុង Biloxi រដ្ឋ Mississippi ទីក្រុង Mobile រដ្ឋ Alabama ទីក្រុង Savannah រដ្ឋ ចចា (Georgia)និងទីក្រុង Jacksonville រដ្ឋ Florida ត្រូវគេរំពឹងថានឹងរងផលប៉ះពាល់យ៉ាងធ្ងន់ធ្ងរដោយព្យុះនេះ៕