ព្រឹទ្ធសភាអាមេរិក កាលពីថ្ងៃចន្ទ (២០ មករា) បានបញ្ជាក់ជាឯកច្ឆ័ន្ទលើព្រឹទ្ធសមាជិកមកពីគណបក្សសាធារណរដ្ឋ លោក ម៉ាកូ រូប៊ីអូ (Marco Rubio) ដែលជាអ្នកប្រកាន់ជំហរតឹងប្រឆាំងចិន និងជាអ្នកគាំទ្រយ៉ាងរឹងមាំរបស់អ៊ីស្រាអែល ជារដ្ឋមន្រ្តីការបរទេសថ្មីរបស់លោកប្រធានាធិបតី Donald Trump។

ព្រឹទ្ធសភាបានគាំទ្រលោក Rubio ដោយការបោះឆ្នោត ៩៩ ទល់នឹង ០ ប៉ុន្មានថ្ងៃប៉ុណ្ណោះបន្ទាប់ពីសមាជិកដ៏យូរនៃគណៈកម្មាធិការទំនាក់ទំនងការបរទេស និងចារកម្មរបស់ព្រឹទ្ធសភារូបនេះ បានឆ្លងកាត់សវនាការបញ្ជាក់តំណែងរបស់ខ្លួន។

លោក Rubio បានក្លាយជាសមាជិកគណៈរដ្ឋមន្ត្រីដំបូងបង្អស់របស់លោក Trump ដែលត្រូវបានបញ្ជាក់ដោយព្រឹទ្ធសភា ត្រឹមតែប៉ុន្មានម៉ោងបន្ទាប់ពីប្រធានាធិបតីអាមេរិកថ្មីបានស្បថចូលកាន់តំណែងជាលើកទីពីរនៅសេតវិមាន។ ការបោះឆ្នោតបន្ថែមលើមន្រ្តីតែងតាំងពីលោក Trump ត្រូវបានគេរំពឹងទុកក្នុងសប្តាហ៍នេះ។

លោក Rubio វ័យ ៥៣ឆ្នាំ ជាកូនប្រុសរបស់ជនអន្តោប្រវេសន៍មកពីប្រទេសគុយបា និងជាអ្នករិះគន់ចិនយ៉ាងចាស់ដៃ ហើយជាអ្នកតស៊ូមតិសម្រាប់អ៊ីស្រាអែល។ ក្នុងអំឡុងសវនាការបញ្ជាក់តំណែង លោកព្រមានថា អាមេរិកត្រូវតែផ្លាស់ប្តូរទិសដៅ ដើម្បីបញ្ជៀសការពឹងផ្អែកកាន់តែខ្លាំងលើចិន ហើយសន្យាថានឹងមានគោលនយោបាយការបរទេសដ៏រឹងមាំផ្តោតលើផលប្រយោជន៍របស់អាមេរិក៕