អគ្គលេខាធិការអង្គការសហប្រជាជាតិ បានប្រាប់កិច្ចប្រជុំជាន់ខ្ពស់នៃក្រុមប្រឹក្សាសន្តិសុខ កាលពីថ្ងៃចន្ទថា មជ្ឈិមបូព៌ាកំពុងឆ្លងកាត់ «ការផ្លាស់ប្តូរយ៉ាងស៊ីជម្រៅ»ដោយមានភាពមិនច្បាស់លាស់ និងមានសក្តា     នុពល។ 

លោក អង់តូនីញ៉ូ ហ្គុយតឺរេស (Antonio Guterres) បានសរសើរដល់ប្រទេសអេហ្ស៊ីប កាតា និងសហរដ្ឋអាមេរិក ចំពោះកិច្ចខិតខំប្រឹងប្រែងរបស់ពួកគេ ដើម្បីទទួលបានបទឈប់បាញ់ និងកិច្ចព្រមព្រៀងដោះលែងចំណាប់ថ្នូររវាងក្រុមហាម៉ាស និងអ៊ីស្រាអែល។ កិច្ចព្រមព្រៀងដែលសម្រេចបានកាលពីសប្តាហ៍មុនបានចូលជាធរមាន កាលពីថ្ងៃអាទិត្យ នៅពេលដែលដំណាក់កាលដំបូងនៃការដោះលែងចំណាប់ថ្នូរ ដោយភាគីទាំងពីរ បានកើតឡើង ហើយចំនួនរថយន្តដឹកទំនិញចូលតំបន់ហ្កាហ្សា ដើម្បីផ្តល់ជំនួយមនុស្សធម៌ ដល់ប្រជាជនដែលស្រេកឃ្លាន បានចាប់ផ្តើមកើនឡើង។

លោក ហ្គុយតឺរេស បានជំរុញឲ្យភាគីទាំងអស់គោរពការប្តេជ្ញាចិត្តរបស់ពួកគេ អនុវត្តឲ្យបានពេញលេញនូវកិច្ចព្រមព្រៀង និងធានាថា វានាំទៅដល់ការដោះលែងចំណាប់ថ្នូរទាំងអស់ និងបទឈប់បាញ់ជាអចិន្ត្រៃយ៍ នៅក្នុងទឹកដីនេះ។

លោកបានអំពាវនាវឲ្យភាគីទាំងអស់នៃកិច្ចព្រមព្រៀងនេះ រួបរួមគ្នាដើម្បីធានាថា ភ្នាក់ងារអង្គការសហប្រជាជាតិទាំងអស់ អាចបំពេញភារកិច្ចរបស់ពួកគេ «ដោយគ្មានឧបសគ្គ» រួមទាំងទីភ្នាក់ងារសង្គ្រោះ និងការងារ ដែលជាទីភ្នាក់ងារជំនួយដ៏ធំបំផុតសម្រាប់ប៉ាឡេស្ទីន ដែលកំពុងស្ថិតនៅក្រោមការគំរាមកំហែងពីបម្រាមដែលជិតមកដល់របស់សភាអ៊ីស្រាអែល ទៅលើប្រតិបត្តិតការ ក្នុងទឹកដីរបស់ប្រទេសនេះ។