អ្នកតំណាងប្រទេសជាច្រើន បានសម្តែងក្តីសង្ឃឹមសម្រាប់ការអនុវត្តន៍ពេញលេញនៃកិច្ចព្រមព្រៀងបទឈប់បាញ់អ៊ីស្រាអែល-ក្រុមហាម៉ាស។ កិច្ចព្រមព្រៀង ដែលត្រូវបានសម្របសម្រួលដោយប្រទេសកាតា អេហ្ស៊ីប និងសហរដ្ឋអាមេរិក បានចូលជាធរមាននៅតំបន់ហ្កាហ្សាកាលពីថ្ងៃអាទិត្យ។ យោងតាមអ្នកសម្របសម្រួលបានឲ្យដឹងថា កិច្ចព្រមព្រៀងបីដំណាក់កាល គឺសំដៅលើ «បទឈប់បាញ់អចិន្ត្រៃយ៍ រវាងគ្រប់ភាគី» ។

នៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ដែលបានធ្វើឡើងកាលពីថ្ងៃចន្ទ អគ្គលេខាធិការអង្គការសហប្រជាជាតិ លោក Antonio Guterres បានកោតសរសើរការបញ្ចប់កិច្ចព្រមព្រៀងរវាងប៉ាឡេស្ទីន និងអ៊ីស្រាអែលនៃបទឈប់បាញ់ និងការដោះដូរអ្នកដែលត្រូវបានឃុំខ្លួន ប៉ុន្តែបានសង្កត់ធ្ងន់ថា កិច្ចខិតខំប្រឹងប្រែងនៅតែត្រូវការដើម្បីធានាបាននូវបទឈប់បាញ់គ្រប់ជ្រុងជ្រោយ ដោះលែងអ្នកដែលជាប់ឃុំទាំងអស់ និងបង្កើនជំនួយមនុស្សធម៌។

លោកស្រី Varsen Aghabekian ទេសរដ្ឋមន្ត្រីទទួលបន្ទុកកិច្ចការបរទេស និងអណិកជនប៉ាឡេស្ទីន បាននិយាយនៅក្នុងសុន្ទរកថារបស់លោកស្រីថា ភាគីប៉ាឡេស្ទីន សង្ឃឹមថាកិច្ចព្រមព្រៀងបទឈប់បាញ់ អាចត្រូវបានអនុវត្ត ហើយអាជ្ញាធរប៉ាឡេស្ទីន ត្រៀមខ្លួនជាស្រេចដើម្បីបន្តការគ្រប់គ្រងនៅតំបន់ហ្កាហ្សា។

«យើងបញ្ជាក់ថា អាជ្ញាធរប៉ាឡេស្ទីនបានត្រៀមខ្លួនជាស្រេចដើម្បីធ្វើការជាមួយប្រទេសជាមិត្ត និងអង្គការនានា ដើម្បីទទួលបន្ទុកគ្រប់គ្រងតំបន់ហ្កាហ្សាស្ទ្រីប និងតំបន់ West Bank រួមទាំងការស្ដារឡើងវិញសេវាសុខភាព ការអប់រំ ទឹក និងអគ្គិសនី ព្រមទាំងការធានាបានការវិលត្រឡប់ទៅវិញនៃជនភៀសខ្លួនទៅកាន់លំនៅឋានរបស់ពួកគេ ហើយរៀបចំសម្រាប់ដំណាក់កាលសាងសង់ឡើងវិញ»។