នាយកប្រតិបត្តិ TikTok លោក Chew Shou Zi បានចូលរួមព្រឹត្តិការណ៍ឡើងកាន់តំណែងរបស់ប្រធានាធិបតីលោក Donald Trump ក្នុងទីក្រុងវ៉ាស៊ីនតោន ដោយបានបង្ហាញខ្លួន នៅឯពិធីរបស់វិហារ មុនពិធីស្បថចូលកាន់តំណែងចាប់ផ្ដើម ខណៈដែលកម្មវិធីចែករំលែកវីដេអូដ៏ពេញនិយមរបស់លោកប្រឈមនឹងការគំរាមកំហែងពីការដាក់បម្រាមទូទាំងប្រទេស។

លោក Trump បាននិយាយថា លោកសង្ឃឹមថា នឹងអាចជួយសង្គ្រោះ TikTok ដែលជាកម្មវត្ថុនៃច្បាប់សន្តិសុខជាតិដែលប្រធានាធិបតីទើបចេញពីតំណែង គឺលោក Joe Biden បានចុះហត្ថលេខា កាលពីខែមេសា ឆ្នាំ២០២៤ ដោយសារមានការលើកឡើងពីក្ដីបារម្ភ ដែលកម្មវិធីនេះជាកម្មសិទ្ធិរបស់ក្រុមហ៊ុនជនជាតិចិន។

កាលពីថ្ងៃចន្ទ (ទី២០ ខែមករា) លោកបានចុះហត្ថលេខាលើក្រឹត្យមួយ ដើម្បីស្វែងរកការពន្យារពេល ៧៥ថ្ងៃ ជុំវិញការអនុវត្តហាមប្រាមកម្មវិធីបង្ហោះវីដេអូកម្សាន្តខ្លីៗដ៏ពេញនិយមមួយនេះ ដែលបានដល់កាលកំណត់បិទដំណើរការ នៅថ្ងៃទី១៩ ខែមករា។ 

នៅមុនមានពិធិស្បថឡើងកាន់តំណែងនេះ លោក Trump បានស្នើនៅលើបណ្ដាញសង្គម Truth Social កាលពីចុងសប្តាហ៍កន្លងមកថា សហរដ្ឋអាមេរិក និង ByteDance ដែលជាក្រុមហ៊ុនមេរបស់ TikTok គួរបង្កើត «ការបណ្តាក់ទុនរួមគ្នា» ដើម្បីរក្សាប្រតិបត្តិការរបស់កម្មវិធីនេះ។ លោកបានសរសេរថា៖ «ខ្ញុំចង់ឲ្យសហរដ្ឋអាមេរិកមានកម្មសិទ្ធិ ៥០ភាគរយក្នុងការបណ្តាក់ទុនរួមគ្នា។ តាមរយៈការធ្វើបែបនេះ យើងអាចរក្សាទុក TikTok ធ្វើឲ្យវាស្ថិតក្នុងការគ្រប់គ្រង ហើយអនុញ្ញាតឲ្យវាដំណើរការជាធម្មតា»។

យ៉ាងណាក្ដី ការវត្តមានខ្លួនរបស់លោក Chew នៅក្នុងពិធីស្បថចូលកាន់តំណែងនេះ គឺជាសញ្ញាមួយដែលបង្ហាញថា TikTok និងក្រុមហ៊ុនមេជនជាតិចិន នៅតែមើលឃើញឱកាស ដើម្បីឲ្យកម្មវិធីទទួលបានការលើកលែងពីបម្រាមនេះ៕