ដោយលោក Donald Trump វិលទៅកាន់តំណែងជាប្រធានាធិបតីសហរដ្ឋអាមេរិកវិញ ជាមួយនឹងរបៀបអនុវត្តន៍ប្រឈមមុខដាក់គ្នា មេដឹកនាំចិន អឺរ៉ុប និងអ៊ុយក្រែន ត្រូវបានគេរំពឹងថា នឹងរួមគ្នាគាំទ្រកិច្ចសហប្រតិបត្តិការពិភពលោក នាថ្ងៃអង្គារ (ទី២១ ខែមករា) នេះ នៅឯការជួបជុំប្រចាំឆ្នាំរបស់ឥស្សរជនពិភពលោក ក្នុងទីក្រុង Davos ប្រទេសស្វីស។

មិនមានអ្វីគួរឲ្យងឿងឆ្ងល់នោះទេថា ឥទ្ធិពលរបស់លោក Trump នឹងក្លាយជាប្រធានបទក្នុងបន្ទប់ នៅឯវេទិកាសេដ្ឋកិច្ចពិភពលោក (WEF) ដែលប្រារព្ធឡើងនៅក្នុងរមណីយដ្ឋាន Swiss Alpine ទោះបីជាមេដឹកនាំមួយចំនួន ជៀសវាងមិនលើកឡើងពីឈ្មោះរបស់លោកក៏ដោយ។ ប្រធានាធិបតីថ្មីរបស់អាមេរិករូបនេះ នឹងចូលរួមនិយាយដោយផ្ទាល់ តាមរយៈអនឡាញនៅថ្ងៃទី២៣ ខែមករា។

លោក Trump បានវិលទៅសេតវិមានវិញជាផ្លូវការ នៅថ្ងៃទី២០ ខែមករា ដោយនាំយកមកជាមួយនូវរដ្ឋបាលគាំពារនិយម ហើយការភ័យខ្លាចបន្ថែមទៀត ដែលថា លោកនឹងធ្វើតាមសន្យា ក្នុងការដំឡើងពន្ធលើប្រទេសចិន និងសម្ព័ន្ធមិត្តរបស់សហរដ្ឋអាមេរិក ក្នុងនោះរួមមានទាំងកាណាដា និងសហភាពអឺរ៉ុបផងដែរ។ ក្នុងសុន្ទរកថាស្បថឡើងកាន់តំណេង លោកបានប្ដេជ្ញាថា ក្រុងវ៉ាស៊ីនតោននឹង «ដំឡើងពន្ធលើប្រទេសបរទេស»។

ប្រធានគណៈកម្មការអឺរ៉ុប លោកស្រី Ursula von der Leyen នឹងចាប់ផ្តើមព្រឹត្តិការណ៍ថ្ងៃនេះ។ ការបង្ហាញខ្លួនរបស់លោកស្រី គឺដើម្បីផ្តល់នូវរសជាតិដល់អ្វីដែលត្រូវរំពឹងទុក ដោយការបង្ហោះរបស់លោកស្រី នៅលើបណ្ដាញសង្គម X គាំទ្រ «តម្រូវការធ្វើការរួមគ្នា ដើម្បីជៀសវាងការប្រកួតប្រជែងជាសកលដែលកាន់តែអាក្រក់ទៅៗ» និងចង់ «បង្កើតភាពជាដៃគូថ្មី»។

ឧបនាយករដ្ឋមន្ត្រីចិន លោក Ding Xuexiang សមាជិកនៃអំណាចកំពូលរបស់បក្សកុម្មុយនីស្តចិនដែលកំពុងគ្រប់គ្រងប្រទេស នឹងឡើងថ្លែងភ្លាមៗ បន្ទាប់ពីលោកស្រី von der Leyen។ ចិនកំពុងមានចំណាត់ការយ៉ាងប្រុងប្រយ័ត្ន ពាក់ព័ន្ធនឹងលោក Trump។ ចំណែកប្រធានាធិបតីអ៊ុយក្រែនលោក Volodymyr Zelenskyy ត្រូវបានគេរំពឹងថា នឹងអំពាវនាវដល់មេដឹកនាំពិភពលោក និងបណ្ដានាយកប្រតិបត្តិក្រុមហ៊ុននានាឲ្យបន្ត ឬសូម្បីបង្កើនឡើងនូវការគាំទ្ររបស់ពួកគេដល់ការប្រយុទ្ធរបស់ប្រទេសលោក ប្រឆាំងនឹងរុស្ស៊ី៕